काठमाडौं, २८ वैशाख-गत ६ चैतका लागि तोकिएको उच्च माध्यमिक शिक्षा परीक्षा (एसईई ) कोरोना भाइरसका कारण अन्तिम समयमा स्थिगित भयो । ४ लाख ८२ हजार विद्यार्थी परीक्षाको प्रतीक्षामा छन् । कहिले परीक्षा हुने हो, अन्योल कायमै छ । त्यसैले शिक्षासँग सरोकार राख्ने केही निकायले यो वर्ष विद्यालयको मूल्यांकनलाई आधार मानेर विद्यार्थीलाई प्रमाणपत्र दिन आग्रह गर्दै आएका छन् ।

तर, राष्ट्रिय परीक्षा बोर्डले विद्यालयको मूल्यांकनलाई आधार मानेर प्रमाणपत्र दिन नसकिने स्पष्ट पारेको छ । राष्ट्रिय परीक्षा बोर्डका अध्यक्ष डा. चन्द्रमणि पौडेलले स्थिति सामान्य भएपछि उच्च माध्यमिक परीक्षा (एसईई ) गर्ने बताएका छन् । शिक्षा पत्रकार सञ्जालले आइतबार आयोजना गरेको अनलाइन अन्तर्क्रियामा उनले स्थिति सामान्य भएपछि परीक्षा गर्ने बताएका हुन् ।

‘कोरोना भाइरसका कारण देश अहिले लकडाउन छ । स्थिति सामान्य भएपछि २ साताको समय दिएर परीक्षा गर्छौं,’ अध्यक्ष पौडेलले भने, ‘परीक्षालाई सहज बनाउन उपकेन्द्र थप गर्ने विषयमा पनि छलफल चलिरहेको छ ।’

कानुन परिवर्तन नभएसम्म परीक्षा नरोकिने उनले बताए । ‘कानुन परिवर्तन नभएसम्म परीक्षा रोकिँदैन,’ उनले भने, ‘परीक्षा कहिले हुन्छ भन्ने कुरा लकडाउनमा भर पर्छ । सरकारले अब सुरक्षित छ नभनेसम्म परीक्षा हुँदैन ।’

अनिवार्य विषयको परीक्षा बोर्डले गर्ने र ऐच्छिक विषयको विद्यालयले नै गर्न सकिने प्रतिवेदनसमेत सरकारलाई बुझाएको उनले बताए ।कार्यक्रममा शिक्षा मन्त्रालयका प्रवक्ता दीपक शर्माले विभिन्न विकल्पका विषयमा छलफल भइरहेको बताए । ‘अहिले नै यही गर्ने भन्ने निर्णय भएको छैन,’ उनले भने, ‘ विद्यार्थी टाढाटाढा भएकाले परीक्षा उपकेन्द्र थप गर्ने विषयमा गृहकार्य भइरहेको छ । अहिले पर्ख र हेरको अवस्थामा छौँ ।’

परीक्षा नियन्त्रक रामराज खकुरेलले उपकेन्द्र बनाउने विषयमा शिक्षा विकास तथा समन्वय इकाइहरूलाई कति आवश्यक पर्छ त्यसको विवरण माग गरिएको बताए । ‘अहिले १९९५ केन्द्र तोकिएको छ,’ उनले भने, ‘उपकेन्द्र थप गरेर परीक्षा गर्न सकिन्छ ।’