बुटवल, २७ वैशाख-दाङमा क्वारेन्टाईनमा बसेकी १ महिलाले जुम्ल्याहा शिशु जन्माएकी छिन् । तुलसीपुर उपमहानगरपालिकाले व्यवस्थापन गरेको क्वारेन्टाइनमा अनिता यादवले जुम्ल्याहा शिशु जन्माएकी हुन् ।

२ दिनदेखि क्वारेन्टाइनमा बसेकी यादवले शुक्रबार जुम्ल्याहा छोरीलाई जन्म दिएकी थिइन् । उनी तुलसीपुर उपमहानगरपालिका-१३ १३ फूलवारीकी स्थायी बासिन्दा हुन् । उनले नर्मल डेलिभरीबाट जुम्ल्याहा सन्तानलाई जन्म दिएकी स्वास्थ्यकर्मीले बताएका छन् ।

तुलसीपुरको रक्षाचौर माविको क्वारेन्टाइनमा रहेकी यादवलाई बिहीबार साँझ सुत्केरी ब्यथाले च्यापेपछि शुक्रबार उनलाई राप्ती प्रादेशिक अस्पतालमा लगिएको थियो । यादवले जन्माएकी १ शिशुको तौल साढे १ केजी र अर्की शिशुको तौल १२ सय ५० ग्राम रहेको छ ।

दुबै बच्चामा अक्सिजन र सुगरको मात्रा कम भएको र आमाको स्वास्थ्यमा पनि समस्या आएपछि उनीहरूलाई तुलसी बाल अस्पतालको आइसीयूमा राखेर उपचार भइरहेको अस्पताल प्रशासनले जनाएको छ । यादवका यसअघि २ छोरा र २ छोरी छन् ।