विराटनगर, बैशाख २७–पूर्वमन्त्री तथा प्रतिनिधिसभा सदस्य शिवकुमार मण्डलले भारतले विस्तारबादी चरित्र प्रदर्शन गरेको आरोप लगाएका छन् । नेपाल कम्युनिष्ट पार्टी (नेकपा) केन्द्रीय सदस्यसमेत रहेका सांसद मण्डलले विश्वव्यापी माहामारीका रुपमा फैएिको कोरोना भाइरस (कोभिड–१९) संक्रमणको जोखिमका कारण विश्वनै लक डाउनमा रहेकाबेला नेपाली भूमिमा भारतले सडक बनाएर विस्तारबादी चरित्र देखाएको आरोप लगाएका हुन् ।

‘कारोना महामारीका कारण विश्व लकडाउनमा रहेको मौका छोपी नेपालको लिपुलेक, कालापानी क्षेत्रमाथि भारतीय साम्राज्यवादद्वारा नेपालको राष्ट्रिय स्वाधिनतामाथिको हस्तक्षेप अरु बढाएको छ । गत कार्तिकमा भारतद्वारा लिपुलेकको ३७२ वर्ग किलोमिटर सीमा अतिक्रमण गरेपछि नेपालका सबै देशभक्त तथा राष्ट्रवादीहरू आन्दोलित भइरहेको बेला फेरि भारतीय शासक वर्गले मानसरोबर जोड्ने सडक निर्माण गरी उद्घाटन गरेर विस्तारबादी चरित्र देखाएको छ ।’ उनले भने,‘भारतका रक्षामन्त्रीलेनै शुक्रबार भिडियो कन्फ्रेन्समार्फत् उद्घाटन गरेर नेपालको राष्ट्रिय स्वाधिनता, भौगोलिक अखण्डता र सार्बभौम सत्तामाथिको नांगो हस्तक्षेप हो । यसका विरुद्धमा सवै देशभक्त नेपाली एक जुट हुनुपर्छ ।’

उनले नेपालको सीमा मिचिएको कुनै पनि नेपालीलाई सह्य नहुँने बताउँदै दुइ देश बिच कुटनितिक माध्यमबाट समाधान गरिनुपर्ने बताए । ‘सीमा मिचिएको कुरा कुनै हालतमा सहने कुरा हुँदैन । यस्ता गतिविधिले विस्तारबादी चरित्र प्रदर्शन गरेको स्पष्ट हुन्छ ।’ उनले भने,‘भारतले तत्काल उक्त कदम सच्याउनुपर्छ ।’ भारतका रक्षामन्त्री राजनाथ सिंहले शुक्रबार एकतर्फीरूपमा लिम्पियाधुरा, लिपुलेक र कालापानीबाट चीनको स्वशासित क्षेत्र तिब्बतको मानसरोवर जोड्ने सडक उद्घाटन गरेका थिए ।