राजविराज, २७ वैशाख-वन्दाबन्दीका कारण डुङ्गा चलाउन नपाउँदा पुर्ख्यौली पेसाका रूपमा सप्तकोशीमा माछा मारेर गुजारा चलाउँदै आएका सप्तरीको १ सय ५० परिवार मुखिया समूदायलाई हातमुख जोर्न समस्या परेको छ । लकडाउन कार्यान्वयनका क्रममा स्थानीय प्रशासनले डुङ्गामा ताल्चा मारेर चलाउन रोकेपछि उनीहरूले सञ्चालन गर्दैआएको डुङ्गा सप्तकोशी किनारामै थन्किएको छ ।
सप्तरीको हनुमाननगर कंकालिनी नगरपालिका-१२ मुखियाटोलका १ सय ५० परिवार मुखिया समूदाय सप्तकोशी नदीमै आश्रित छन् । पुर्ख्यौली पेसाका रूपमा माछा मारेरै उनीहरू आफ्ना परिवारको गुजारा चलाउँदै आए पनि यतिवेला वन्दाबन्दीका कारण डुङ्गा किनारमै थन्किएको हो ।
आफूलगायत परिवारको गुजारा चलाउने एक मात्र उपायका रुपमा रहेको डुङ्गा पनि किनारमै थन्किदा भोकभोकै बस्नुपर्ने अवस्था आएको स्थानीय मनिकलाल मुखियाको दुखेसो छ । सिजनमा माछा मार्ने, वर्षामा कोशीको बाढीमा बगेर आउने काठदाउरा डुंगाकै माध्यमले संकलन गरी बेचेर गुजारा चलाउने गरेको सुनाउँदै उनले अहिले बेकाम भएर बस्नु पर्दा साह्रै समस्या परेको बताए ।
