काठमाडौं, २६ वैशाख-मलेसिया सरकारले अवैध रुपमा लुकेर काम गर्दै आएका आप्रवासी कामदारलाई देश छाड्न अपिल गरेको छ । कडा प्रवन्धबीच औद्योगिक क्षेत्र र मलहरू खुला गरेको मलेसियामा संक्रमितहरूको बृद्धिदर अहिलेकै अवस्थामा रहे त्यसलाई नियन्त्रण गर्न नसकिने मलेसियाली सञ्चारमाध्यमले जनाएका छन् ।

मलेसियाले १ जनवरी २०२० यता आवासीय भिसा समाप्त भएका आप्रवासी श्रमिकलाई आवागमन नियन्त्रण आदेशको अवधि सकिएको २ हप्ताभित्र देश छोड्न आदेश दिएको हो ।

आवागमन नियन्त्रण आदेश लागू हुनुभन्दा अगाडि वा सुरू भएपछि भिसाको म्याद समाप्त भएका विदेश कामदारको भिसा नविकरण गर्नुपर्ने भएमा आवागमन नियन्त्रण आदेश समाप्त भएको ३० दिनभित्र आवेदन दिनुपर्ने व्यवस्था गरिएको छ ।

मलेसियन अधिकारीहरूको हालको तयारीले ४ दिनपछि आवागमन नियन्त्रण आदेशको अवधि सकिने छ । मलेसियाले १६ मार्चदेखि लागू गरेको आवागमन नियन्त्रण आदेश जारी गरेको हो । पटकपटक थपिएको उक्त आदेश अर्को आदेश नभएमा आगामी १२ मेसम्म जारी रहने छ।

१ जनवरीयता त्यस्ता भिसा सकिएका कामदारलाई मलेसियाका सरकारी निकायसँग सम्पर्क नगरी पहिले जस्तै गरी आफैँले टिकट काटेर घर फर्किन अनुमति दिइएको छ । उनीहरूले जनवरीयता बसेको कुनै अध्यागमन शुल्क वा जरिमानासमेत तिर्नु नपर्ने मलेसियन अध्यागमनलाई उदृत गर्दै नेपाली दूतावासले जनाएको छ ।

मलेसिया अध्यागमन विभागको परिवर्तित भिसा नीति सम्बन्धी पछिल्लो निर्णय जानकारी दिँदै क्वालालम्पुरस्थित नेपाली दूतावासले जनवरीयता आवासीय भिसा समाप्त भएका नेपाली कामदारहरूलाई अध्यागमनको सूचना अनुसारको प्रक्रिया अपनाउन भनेको छ ।

मलेसियामा जनवरी यताको ४ महिनामा ९ हजार भन्दा बढी नेपाली भिसा र करार अवधि सकिएर घर फर्किने प्रतिक्षामा रहेको नेपाली दूतावासले आँकलन गरेको छ । मलेसियामा करिब ९० हजार अवैध कामदार रहेको दूतावासको अनुमान छ ।