काठमाडौं २५ वैशाख-काठमाडौंको गौशालामा निजी कार र एम्बुलेन्स आपसमा ठोक्किँदा १ जना घाइते भएका छन् । साढे ३ बजेको समयमा गौशालास्थित सडकखण्डमा मित्रपार्कबाट एयरपोर्टतर्फ आउँदै गरेको बा१०च ८५१३ नम्बरको निजी कारलाई विपरीत दिशाबाट आएको बा८छ ६९२८ नम्बरको एम्बुलेन्सले ठक्कर दिएको हो ।

ठक्करबाट निजी कार चालक काठमाडौंको गोंगबु बस्ने २९ वर्षीय सविन श्रेष्ठ घाइते भएका छन् । दुर्घटनामा निजी कार चालक सामान्य घाइते भएको महानगरीय ट्राफिक प्रहरी महाशाखा प्रमुख प्रहरी वरिष्ठ उपरीक्षक भीमप्रसाद ढकालले जानकारी दिए । उनका अनुसार दुवै सवारी साधनमा क्षति पुगेको छ ।

एम्बुलेन्स चालक मोरङको पथरी नगरपालिका बस्ने ३६ को रामबहादुर चौधरी रहेका छन् । उनले मादक पदार्थ सेवन गरी चलाएका कारण दुर्घटना भएको प्रहरीले जनाएको छ । साथै, सवारी चालक अनुमति (लाइसेन्स) समेत नभएको पाइएको छ । दुवै सवारी साधन र चालक महानगरीय ट्राफिक प्रहरी वृत्त, गौशालाको नियन्त्रणमा रहेको प्रहरीले जनाएको छ ।