काठमाडौं, १९ वैशाख-लकडाउनको समयमा पनि उपभोक्ता ठगीमा पर्न थालेपछि सरकारले अनुगमनलाई तीव्रता दिएको छ । लकडाउनमा सीमित समयमा खुल्ने सीमित पसहरूले पनि ठगी गरेको गुनासो आएपछि अनुगमनलाई निरन्तरता दिइएको वाणिज्य, आपूर्ति तथा उपभोक्ता संरक्षण विभागले जनाएको छ ।

लकडाउनको ३८ दिनको अवधिमा २ सय ४५ पसल तथा फर्महरूमा अनुगमन गरेको जनाएको छ । अर्धन्यायिक निकायको रूपमा रहेको विभागले उपभोक्ता संरक्षण ऐन, २०७५ अनुसार अनुगमनपछि ३ लाख रुपैयाँसम्म जरिमाना लगाउन सक्छ । अनुगमन अधिकृत कसुरको प्रकृति हेरेर ५ हजारदेखि ३ लाख रुपैयाँसम्म जरिमाना गराउन सक्ने व्यवस्था गरिएको छ ।

लकडाउनका बीच २ सय ४५ मध्ये १ सय ९ वटा सामान्य रहेको ६० वटामा सामान्य कैफियत देखिएको छ भने ७० वटालाई जरिमाना गराइएको विभागले जनाएको छ ।

११ चैतदेखि १८ वैशाखसम्म सबैभन्दा बढी ग्यास पसल ८० र खाद्यान्न पसल ४६ वटामा अनुगमन गरिएको छ । तर, सबैभन्दा बढी जरिमाना सर्जिकल सामग्रीको व्यापार गर्ने व्यापारीलाई लगाइएको छ ।