काठमाडाैं, १९ जेठ-तत्कालीन राजा वीरेन्द्रसहित राजपरिवारका १० जना सदस्यको हत्या भएको दरबार हत्याकाण्ड भएको आज १९ वर्ष पुगेको छ । १९ वर्षअघि भएको यो रहस्यमय हत्याकाण्ड आजका दिनसम्म पनि कसले र किन गरायो भन्ने खुल्न सकेको छैन ।

१९ जेठ २०५८ मा तत्कालीन राजा वीरेन्द्रसहित रानी ऐश्वर्य, युवराज दीपेन्द्र र निराजन तथा युवराज्ञी श्रुती, अधिराजकुमार धीरेन्द्र, अधिराजकुमारी शान्ति राज्यलक्ष्मी सिंह, शारदा राज्यलक्ष्मी शाह, शाहज्यादी जयन्ती राज्यलक्ष्मी शाह, कुमार खड्ग विक्रम शाहलगायतको हत्या भएको थियो ।

यो हत्याकाण्डमा वीरेन्द्र, ऐश्वर्या, निराजन, श्रुती, शान्ति, शारदा, जयन्ती, कुमार खड्गविक्रम घटनास्थलमै मारिए । गोली लागेर घाइते भएका दीपेन्द्र र धीरेन्द्रको ३ दिनपछि सैनिक अस्पताल छाउनीमा निधन भयो । दरबारका सदस्यहरू कोमल, शोभा, केतकी  र गोरखशमशेर घाइते भएका थिए ।

हत्यालगत्तै सर्वोच्च अदालतका तत्कालीन प्रधानन्यायाधीश केशवप्रसाद उपाध्याय, सभामुख तारानाथ रानाभाट सम्मिलित छानविन समितिले तत्कालीन युवराज दीपेन्द्रलाई हत्याको मुख्य योजनाकारका रूपमा प्रस्तुत गरेको थियो । तर, यो प्रतिवेदनमा आमजनताले अझैसम्म विश्वास गरेका छैनन् ।

गणतन्त्र आउनुअघि यो हत्याकाण्डका विषयमा दरबारकै जीवित अन्य सदस्यसँग जोडिए पनि गणतन्त्रपछि भने विस्तारै यो घटना सेलाउँदै जान थालेको छ ।

सरकारले हत्याकाण्डबारे अर्को उच्चस्तरीय समिति बनाएर छानविन गर्ने प्रतिवद्धता नदेखाउँदा सिंगो वंशको नाश हुने यो हत्याकाण्ड रहस्यकै गर्भमा छ ।

छानविन समितिले युवराज दीपेन्द्र शाहले सबैलाई गोली चलाएर आफूलाई पनि गोली हानेको  प्रतिवेदन सार्वजनिक गरिएपछि यो घटना त्यत्तिकै सेलाएर गयो ।

छानविन समितिका सदस्यहरूसमेत आफैँले बनाएको प्रतिवेदनलाई अनौपचारिक रूपमा खण्डन गर्छन् । तर, वास्तविकता के हो भन्ने विषयमा त्यसबेला दरबारकै सदस्यबाट असहयोग भएको उनीहरूको अनौपचारिक प्रतिक्रिया रहँदै आएको छ ।

दरबार हत्याकाण्डपछि राजतन्त्रको अन्त्य भई अन्तिम राजा ज्ञानेन्द्रले समेत नारायणहिटी छोडिसकेका छन् । तर, नारायणहिटी छाडेका तत्कालीन राजा ज्ञानेन्द्रले समेत यो घटनामा थप अनुसन्धानको माग अघि सारेका छैनन् ।