विराटनगर, बैशाख १९–पूर्वमन्त्री तथा प्रतिनिधसभाका सदस्य शिवकुमार मण्डलले पहुँच र पावरका आधारमा मात्र योजना छनौट नगर्न सरकारलाई सुझाव दिएका छन् ।

आगामी बजेटको विषयवस्तुमा भौतिक पूर्वाधार तथा यातायात मन्त्रालयमा सांसदहरुसँग भएको छलफलमा उनले यस्तो बताएका हुन् । भौतिक पूर्वाधार तथा यातायात मन्त्री वसन्त नेम्वाङ र सांसदहरुबिच भएको छलफलमा उनले शक्ति र पहँुचका आधरमा एउटै निर्वाचन क्षेत्रमा बढी योजना पर्ने परिपाटीको अन्त्य हुनुपर्ने बताए ।

सांसद मण्डलले बिगतमा मन्त्रीहरुले आफ्नै निर्वाचन क्षेत्रमा मात्र अत्याधिक योजना पार्ने गरेकाले अबदेखि कुनै एक निर्वाचन क्षेत्रको मात्र नभई समग्र देशको मन्त्री बन्नुपर्नेमा जोड दिए ।

उनले योजना छनौट गर्दा देशको समग्र विकासका आधारमा योजनाहरुलाई सम्बोधन गर्नेगरी बजेट बिनियोजन हुनुपर्ने बताए । सांसद मण्डलले नितिगत समस्या र झण्झटिलो खरिद ऐनका कारण विकास निर्माणमा ढिलासुस्ती भइरहेको बताउँदै खरिद ऐन संशोधन र आवश्यक कानुनहरुमा भएको झन्झटिलो व्यवस्था अन्त्य गरिनुपर्नेमा समेत जोड दिए ।