जनकपुर, १४ वैशाख-आरडीटीमा पोजिटिभ देखिएकी पर्साको वीरगञ्जकी १ युवतीको मृत्यु भएको छ । वीरगन्ज महानगरपालिका–१० अशोकवाटिकाकी २३ वर्षीया युवतीको आज बिहान मृत्यु भएको हो । ब्लडक्यान्सरले ग्रसित ती युवतीको चितवन भरतपुरस्थित क्यान्सर अस्पतालमा उपचार हुँदै आएको थियो ।

पारिवारिक स्रोतका अनुसार उनलाई स्वास्थ्यमा समस्या देखिएपछि ५ चैत २०७६ मा भरतपुर क्यान्सर अस्पतालमा लगिएको थियो ।अस्पतालमा जाँचपछि ब्लडक्यान्सर भएको प्रमाणित गर्दै प्रारम्भिक उपचारपछि ९ चैत डिस्चार्ज गरिएको थियो ।

कोरोना भाइरस रोकथाम तथा नियन्त्रणका लागि सरकारले ११ चैतदेखि लकडाउन सुरु गरेपछि उनलाई शनिबार बिहान स्वास्थ्यमा समस्या आएपछि अभिभावकले सुरुमा नेशनल मेडिकल कलेजमा लगेका थिए । तर, मेडिकल कलेजले बेड खाली नरहेको भन्दै फर्काएपछि युवतीलाई एडभान्स अस्पिटलमा लगियो ।

एडभान्स हस्पिटलले पनि आइसीयू बेड खाली नभएको जवाफ दिएपछि अभिभावकले युवतीलाई तराई हस्पिटलमा पुर्याएका थिए ।शनिबार तराई हस्पिटलमा कोरोना संक्रमणको आशंकामा युवतीको आरडीटी टेष्ट गर्दा रिपोर्ट पोजिटिभ देखिएको बताइएका छ । अस्पतालका अनुसार ति युवतीको दोस्रो रिपोर्ट पनि पोजिटिभ देखिएको थियो ।

तराई अस्पतालमा लगातार रिपोर्ट पोजिटिभ आएपछि शनिबार राति नारायणी अस्पतालबाट गएका स्वास्थ्यकर्मीको टोलीले पनि युवतीको आरडीटी टेष्ट गरेको थियो ।

तेस्रो पटकको टेष्ट रिपोर्ट पनि पोजिटिभ नै आएपछि युवतीलाई आइतबार बिहान १ बजेतिर तराई अस्पतालबाट नारायणी अस्पताल ल्याउने क्रममा मृत्यु भएको नारायणी अस्पतालका मेडिकल सुपरिटेन्डेन्ट मदन उपाध्यायले जानकारी दिए ।

युवतीको शव अहिले नारायणी अस्पतालमै छ । उनको मृत्युको कारण यकिन गर्न स्वाबको नमुना संकलन गरी पीसीआर परीक्षणका लागि हेटौँडाको प्रयोगशालामा आइतबार बिहान पठाइएको उपाध्यायले बताए ।