काठमाडौं, ११ वैशाख-सम्भावित कोरोना भाइरस संक्रमणको आशंकामा बिहीबारसम्म ४३ हजार बढीको परीक्षण गरिएको छ । स्वास्थ्य मन्त्रालयको नियमित पत्रकार सम्मेलनमा ४३ हजार ७ सय २२ जनाको परीक्षण गरिएको जानकारी दिइएको हो । यी परीक्षण पीसीआर र आरडीटी  विधिबाट गरिएको हो ।

पिसिआर विधिबाट ९ हजार १ सय ९९ र आरडीटी विधिबाट ३४ हजार ५ सय २३ जनाको कोरोना भाइरस संक्रमण परीक्षण गरिएको हो । २४ घण्टाको अवधीमा ३ हजार ३ सय ५ वटा नमुना परीक्षण गरिएको स्वास्थ्य मन्त्रालयका प्रवक्ता डा. विकास देवकोटाले बताए ।

परीक्षणका क्रममा बिहीबार थप २ जनामा कोरोना संक्रमण देखिएको छ । उदयपुरकी ५५ वर्षीया महिला र जनकपुरका १४ वर्षीय पुरुषमा कोरोना भाइरस पोजिटिभ देखिएको प्रवक्ता देवकोटाले बताए । थपिएका २ सहित कोरोना संक्रमितको संख्या ४७ पुगेको छ ।

आज थप २ जना संक्रमित संक्रमण मुक्त भएर घर फर्किएका छन् । उनीहरू काठमाडौंको पेप्सीकोलासित सनसिटी अपार्टमेन्टमा बस्ने ८१ वर्षीया महिला र ५८ वर्षीय पुरुष हुन् । उनीहरूको ललितपुरको पाटन अस्पतालमा उपचार गरिएको थियो ।