काठमाडौं, ११ वैशाख-सरकारले घोषणा गरेको लकडाउनको बुधबार १ महिना पूरा भएको छ । नेपालमा कोरोना संक्रमणको जोखिम बढेपछि सरकारले गत चैत ११ गतेबाट लक डाउन जारी गरेको थियो । चैत ११ गते बिहान ६ बजेबाट सुरु हुनेगरी गरि जारी गरिएको लक डाउनको समय पटकपटक थप भएर वैशाख १५ गतेसम्म पुर्‍याइएको छ ।

लकडाउनमा अत्यावश्यक र पासबाहक सवारीबाहेक अन्य साधनहरू सञ्चालन भएका छैनन् । अत्यावश्यक कामबाहेक बाहिर हिँड्डुल गर्नेलाई प्रहरीले नियन्त्रणमा लिएर केही समय होल्ड गर्ने नीति लिएको छ ।

ठाउँ ठाउँमा प्रहरीले चेकजाँचलाई कडाइ गरेको छ । लकडाउनको समयमा पनि उपत्यका छाडेर बाहिरिनेको संख्यामा भने कमी आउन सकेको छैन् । सवारी साधन बन्द भए पनि हिँडैरै गन्तव्य जानेहरूको संख्या अत्याधिक रहेको छ ।

उपत्यकाका भीडभाड हुने ठाउँहरु सुनसान रहे पनि भित्रि गल्लीहरूमा केही खाद्यन्न पसल र तरकारी पसलहरू भने बिहान बेलुका खुल्ने गरेका छन् । लक डाउनले दैनिक ज्यालादारी गर्ने मजदुरलाई समस्या भएको छ ।

स्वास्थ्य तथा जनसंख्या मन्त्रालयको तथ्याङ्क अनुसार बुधबारसम्म नेपालमा ४५ जनामा कोरोना संक्रमण देखिएको छ । ७ जना उपचारपछि निको भएर घर फर्किएका छन् । प्रदेश-१ सबैभन्दा बढी प्रभावित भएको छ ।