विराटनगरको मेयरमा नागेश र उपमेयरमा शिल्पा फराकिलोे मतान्तरले विजयी - News Birat

विराटनगरको मेयरमा नागेश र उपमेयरमा शिल्पा फराकिलोे मतान्तरले विजयी

न्यूज विराट

विराटनगर / विराटनगर महानगरपालिकामा पाँच दलीय गठबन्धनका उम्मेदवार नागेश कोइराला मेयर र एमालेकी शिल्पा निराला कार्की उपमेयरमा निर्वाचित भएका छन् ।

गएराति सार्वजनिक गरिएको मतपरिणामको अन्तिम मतपरिणाम अनुसार कोइराला र कार्की विजयी भएका हुन् । मेयरमा नागेश ८७१५ मतको अग्रतासहित विजयी हुँदा उपमेयरमा कार्की ११४६१ मत अन्तरले विजयी भइन् । कोइरालाले ३०१७० मत भने कार्कीले २५८६० ल्याएका हुन् ।

मेयरमा कोइरालाका निकटतम प्रतिस्पर्धी एमालेका सागरकुमार थापाले २१४५५ मत पाए त्इस्तै स्वतन्त्र उम्मेदवार उमेशकुमार यादवले ८७९५ मतका साथ तेस्रो चता राप्रपाका प्रल्हाद साहले ५२१६ मतका साथ चौथो स्थानमा चित्त बुझाए ।

उपमेयरमा कार्की निकटतम प्रतिस्पर्धी जसपाका केन्द्रीय अध्यक्ष उपेन्द्र यादवका छोरा अमरेन्द्र यादव १४२१९ मत ल्याए । तेस्तै राप्रप्राकी विन्दा लुईटेल आचार्यले ६४०१ मत ल्याउँदै तेस्रो भइन भने मोओवादी केन्द्रबाट विद्रोह गर्दै स्वतन्त्रमा उम्मेदवार दिएकी नमिता न्योपानेले ५११७ मतका साथ थौथो स्थानमा चित्त बुझाउँनु पर्यो ।

कोइराला गठबन्धनका उम्मेदवार भए पनि कार्की एमालेबाट एकल उम्मेदवार बनेकी थिइन् । कार्कीसँग गठबन्धनतर्फ जसमापाका यादव लडे पनि उनी निरीह देखिए ।

विजयको माला पहिरिँदै गर्दा मेयर कोइरालाले भने, ‘मेरो सबै कुरा घोषणा पत्रमा आइसकेको छ, मैले चुनाव जित्नुमा आम कार्यकर्ता, मतदाता, पार्टी पंत्ति र शुभचिन्तकको सहयोग छ, म कर घटाउँछु, करको दायरा बढाउँछु र भ्रष्टाचार निर्मूल पार्छु ।’

उपमेयरमा विजयी कार्कीले संविधानले तोकेको अधिकारलाई प्रयोग गर्दै आमजनतामा न्यायको अनुभूति दिने बताइन् । ‘म कानुन बनाउने, प्रचलित कानुनलाई उपयुक्त तरिकाले प्रयोग गर्ने र जनतालाई न्यायको अनुभूति दिने गरी काम गर्छु,’ कार्कीले भनिन्, ‘मलाई साथ सहयोग गरी उपमेयरमा जिताउनका लागि सबै पार्टीबाट सहयोग भएको छ, म पार्टीबाट निर्वाचित भएँ, तर निष्पक्ष रूपमा जनताको सेवा गर्छु ।’

यसअघिको स्थानीय निर्वाचन २०७४ मा विराटनगर महाननगरपालिकामा नेपाली कांग्रेसबाट मेयरमा भीम पराजुली र उपमेयरमा इन्दिरा कार्की निर्वाचित भएकी थिए ।

मेयरमा निर्वाचित कोइराला नेपाली कांग्रेस मोरङ जिल्लाका उपसभापति हुन्, कार्की एमाले महानगर कमिटीका उपाध्यक्ष हुन् । विराटनगर महानगरपालिकामा १ लाख ३३ हजार मतदाता रहेकोमा ८९ हजार ६७८ मत खसेको थियो ।

मा प्रकाशित

यसमा तपाईको मत:

© Copyright 2017 - 2022 Newsbirat pvt ltd. All Rights Reserved.

Design / Developed by codebundles