एजेन्सी, फागुन १४–जर्मन क्लब बायर्न म्युनिखले इंग्लिस क्लब चेल्सीमाथि महत्वपूर्ण जित निकाल्दै च्याम्पियन्स लिगको अघिल्लो चरण प्रवेशको सम्भावना बलियो बनाएको छ । बुण्डेसलिगा लिडर बार्यन म्युनिखले चेल्सीमाथि ३–० को प्रभावशाली जीत निकालेको हो । अन्तिम १६ को पहिलो लेग अन्तर्गत मंगलबार राति भएको खेलमा बार्यनले इंग्लिस क्लब चेल्सीलाई उसकै मैदानमा पराजित गरेको हो ।

अवे मैदानमा भएको खेलमा बार्यनका लागि सर्ज ग्नाब्रीले दुई तथा रोबर्ट लेवान्डोस्कीले एक गोल गरे । पहिलो हाफमा गोलरहित रहेको खेलमा ग्नाब्रीले ५१ र ५४ औं मिनेटमा गोल गर्दै बार्यनलाई अग्रता दिलाए भने लेवान्डोस्कीले ७६ औं मिनेटमा गोल गरेपछि बार्यनले ३–० को जित निश्चित गरेको हो ।

खेलको ८३ औं मिनेटमा मार्कस अलोन्सो सीधै रातो कार्ड पाएर मैदानबाटबाहिरिएपछि चेल्सी अन्तिम समयमा १० खेलाडीमा सीमित भएको थियो । दोस्रो लेग आउँदो १८ मार्चमा बार्यनको मैदानमा हुनेछ ।