विराटनगर, माघ २८–नेपाल भ्रमण वर्ष–२०२० लाई लक्षित गरी नेपालकै होचो भूभाग कचनकवलमा तेस्रो कचनकवल गोल्डकप नकआउट फुटबल प्रतियोगिता सुरु भएको छ । कचनकवल गाउँपालिका खेलकुद विकास समितिको विशेष सहयोग तथा बनियानी युवा क्लबको आयोजनामा सुरु भएको प्रतियोगिताको उद्घाटन प्रदेश सांसद बसन्त बानिया र ओमप्रकाश सरावगीले गरे ।
उद्घाटन खेलमा जलथल फुटबल क्लब झापालाई एककाविरुद्ध दुई गोलले पराजित गर्दै रेड हर्ष फुटबल क्लब इलाम क्वाटरफाइनलमा प्रवेश गरेको छ । खेलको म्यान अफ द म्याच इलामका किस्मत राई घोषित भए । फागुन ५ गतेसम्म सञ्चालन हुने प्रतियोगितामा आठ टिमले सहभागिता जनाएका छन् । प्रतियोगितामा बिजेता टिमलाई नगद १ लाख ५० हजार र उपबिजेता टिमलाई १ लाख नगद पुरस्कार दिइने आयोजकले जनाएको छ ।
