एजेन्सी, पुस २९–पूर्वी केन्याको एक ग्रामीण क्षेत्रमा रहेको एक विद्यालयमा आतंकवादीहरूले तीन जना शिक्षकको हत्या गरेका छन् । केन्यामा केही वर्षदेखि हत्या आतंक जारी राखेको समूह अल सबाबले सो विद्यालयमा प्रवेश गरी तीन जना शिक्षकको हत्या गरेको र अर्का एक जनालाई अपहरण गरी लगेको स्थानीय सञ्चारमाध्यमहरूले जनाएका छन् । केन्यामा सो समूहले विगतदेखि नै आतंककारी क्रियाकलाप जारी राख्दै आएका छन् । अल सबाबले शिक्षक र विद्यार्थीलाई तारो बनाउने गरेको छ ।

ठूलो संख्यामा आएका हतियारधारीले आक्रमण गरी त्यहाँका केही विद्यालयमा पनि क्षति पुर्याएका छन् । साथै ती आक्रमणकारीले पूर्वी केन्याको कमुथेमा रहेको प्रहरी चौकीमा पनि उनीहरूले आगजनी गरेका छन् । उनीहरूले स्थानीय अस्पतालबाट एक जना नर्सलाई पनि अपहरण गरी लगेको बताइएको छ । साथै स्थानीय स्वास्थ्य संस्थाका कर्मचारीलाई पनि उनीहरूले आक्रमण गरी घाइते बनाएका छन् । अल कायदासँग सम्बन्ध रहेको सो अल सबाब नामक आतंककारी समूहले केन्याका विद्यालयबाट बालिकालाई पनि अपहरण गर्ने गरेको छ । उनीहरूले बालिका शिक्षाको विरोध गर्ने गरेका छन् । त्यसैले बालिका शिक्षा दिने विद्यालयबाट छात्रछात्रा नै अपहरण गर्ने गरेका छन् ।