विराटनगर । विराटनगर ५ कृषिमार्गस्थित मुनालपथमा रहेको किड्स भिलेज विद्यालयले विद्यार्थीहरूको चौतर्फी विकासका लागि अभिभावक अभिमुखीकरण कार्यक्रम आयोजना गरेको छ।
शनिबार मोरङ उद्योग तथा व्यापार संघको सभाकक्षमा आयोजित उक्त कार्यक्रमको सहजीकरण शैक्षिक अभियन्ता अभिषेक घिमिरेले गरेका थिए। कार्यक्रममा अभिभावकहरूले तार्किक र व्यवहारिक तर्क तथा जिज्ञासा राखेका थिए।
विद्यालयका प्रधानाचार्य विजय दाहालले यस्ता कार्यक्रमहरूमा सहजकर्ता र अभिभावकहरूबीच भएको छलफलले विद्यार्थीको चौतर्फी विकासका लागि उपलब्धिमूलक परिणाम दिने बताए।
सहजकर्ता अभियन्ता घिमिरेले अभिभावकहरूले उत्साहपूर्वक उपस्थिति जनाई विद्यार्थीको विकासका लागि चासो देखाएको बताए। उनले विद्यार्थीको चौतर्फी विकासका लागि विद्यालय एक्लैले मात्र गर्न नसक्ने र त्यसका लागि परिवार तथा समाजको पनि उत्तिकै भूमिका हुने धारणा राखे।
कार्यक्रममा किड्स भिलेजका अध्यक्ष मदन खतिवडा, प्रबन्ध निर्देशक पंकज जैन, निर्देशकहरू नवजित प्रधान तथा निरु पौडेल लगायत विद्यालयका शिक्षकहरूको बाक्लो उपस्थिति रहेको थियो।
यस कार्यक्रमले विद्यार्थीहरूको शैक्षिक तथा व्यक्तित्व विकासमा अभिभावक र विद्यालयबीचको समन्वयलाई थप बलियो बनाउने अपेक्षा गरिएको छ।