विराटनगर । विराटनगरका सक्रिय पत्रकार तथा ओवी मिडियाका निर्देशक प्रेम देवानका आफ्ना स्वर्गीय पिता कृष्ण देवानको स्मृतिमा स्थापित छात्रवृत्ति पुरस्कार दुई विद्यार्थीलाई प्रदान गरिएको छ ।
विराटनगर ९ स्थित इडेनबर्ग कलेजमा बिबिएस तेस्रो वर्षमा अध्ययनरत प्रेम रौनिया र आरिफ अन्सारीलाई उक्त छात्रवृत्ति प्रदान गरिएको हो। कलेजले शनिबार एक विशेष कार्यक्रमको आयोजना गरी यी दुई मेधावी विद्यार्थीलाई सम्मानित गरेको छ।
कलेजका प्रमुख डिके शाह (दिपेन्द्र साह) का अनुसार, दुवै विद्यार्थीले अध्ययनमा उत्कृष्ट प्रदर्शन देखाएका छन्। यस्ता प्रतिभाशाली विद्यार्थीलाई प्रोत्साहन गर्न पाउँदा हामी अत्यन्तै खुसी भएको कलेजले जनाएको छ ।
पुरस्कार वितरण समारोहमा पत्रकार प्रेम देवान, कलेजका प्रिन्सिपल डिके साह र संचालक भुवन नेपालले संयुक्त रूपमा विद्यार्थीहरूलाई पुरस्कृत गरे।
पत्रकार देवानले आफ्ना पिताको स्मृतिमा गत वर्षदेखि यो छात्रवृत्ति प्रदान गर्न थालेको र आगामी वर्षहरूमा पनि यसलाई निरन्तरता दिने बताए। ‘मेरा बुवा यही कलेजमा विगतमा काम गर्दै आउनुभएको थियो । शिक्षाको महत्त्व बुझ्ने व्यक्ति हुनुहुन्थ्यो। उहाँको स्मृतिमा शिक्षामा उत्कृष्टता हासिल गर्ने विद्यार्थीलाई सहयोग गर्न पाउँदा आत्मिक सन्तुष्टि मिलेको छ,’ देवानले भने।
छात्रवृत्ति पाउने विद्यार्थी आरिफ अन्सारीले आफ्नो खुसी व्यक्त गर्दै भने, ‘कृष्ण देवान स्मृति छात्रवृत्ति पाउनु मेरो लागि सम्मानको कुरा हो। यसले मलाई अझ राम्रो अध्ययन गर्न प्रेरित गरेको छ।’
इडेनबर्ग कलेजका प्रिन्सिपल डिके साहले यस्ता प्रोत्साहनमूलक कार्यक्रमले विद्यार्थीहरूमा सकारात्मक प्रतिस्पर्धाको वातावरण सिर्जना गर्ने बताए।