विराटनगर । राष्ट्रिय सौन्दर्यकर्मी युनियन नेपाल (नाबुन) विराटनगर महानगर कमिटीले शनिबार माता तीर्थ औंशीको अवसर पारेर विराटनगरस्थित मानव सेवा आश्रममा रहेका ज्येष्ठ नागरिकहरुलाई विशेष भोजन व्यवस्था गरेको छ। आश्रममा रहेका आमाहरूलाई सम्मान गर्दै यो विशेष कार्यक्रम आयोजना गरिएको नाबुन विराटनगरकी अध्यक्ष बसन्ती गुरुङले बताइन्।

कार्यक्रममा अध्यक्ष गुरुङले ज्येष्ठ नागरिकहरू हाम्रो समाजका लागि अमूल्य सम्पत्ति भएको बताउँदै समाजमा ज्येष्ठ नागरिकहरूको योगदानलाई सदैव सम्मान गर्नुपर्ने कुरामा जोड दिइन्। नाबुन विराटनगरले यस्ता सामाजिक उत्तरदायित्व बहन गर्ने कार्यक्रमहरूलाई निरन्तरता दिएर अगाडी बढने उनले बताइन् । ‘हामी पेशागत रूपमा सौन्दर्यसँग जोडिएका छौं, तर सामाजिक उत्तरदायित्व पनि हाम्रो प्राथमिकतामा पर्छ,’ उनले भनिन्।

नाबुनकी केन्द्रीय सचिवालय सदस्य ममता प्रधानले सुन्दर संसारमा ज्येष्ठ नागरिकहरूको अथक योगदान रहेको बताउँदै आजका दिन हामीले उहाँहरुलाई भोजन गराउन पाउँदा हामी धन्य भएका बताइन् । ‘माता तीर्थ औंशी हाम्रो संस्कृतिमा आमाको सम्मानको प्रतीक हो। यो दिन हामीले केवल आफ्नै आमालाई मात्र होइन, समाजका सबै आमाहरूलाई सम्मान गर्न सिक्नुपर्छ,’ उनले भनिन् ।

मानव सेवा आश्रममा रहेका ६५ जना ज्येष्ठ नागरिकहरूले नाबुनको यस पहललाई अत्यन्तै सराहना गरेका छन्।
कार्यक्रममा नाबुनकी केन्द्रीय सदस्य गंगा तामाङ, कोशी प्रदेश अध्यक्ष कला डाँगी, कोषाध्यक्ष अमिता पोखरेल, पूर्व उपाध्यक्ष ललिता धिमाल, प्रदेश सदस्य मन्दिरा भट्टराई, नाबुन विराटनगरको निर्वतमान अध्यक्ष भली सुब्बा लगायत विभिन्न सौन्दर्यकर्मीहरूको उल्लेख्य सहभागिता रहेको थियो।

आश्रमकी पार्वती तिवारले नाबुनको यस पहललाई धन्यवाद दिँदै भनिन्, ‘समाजका विभिन्न वर्गले यसरी नै सहयोग र समर्थन गरेमा ज्येष्ठ नागरिकहरूको जीवन सहज हुनेछ। हामी सबैले मिलेर हाम्रा आमाबुवाहरूलाई सम्मानजनक जीवन दिने वातावरण निर्माण गर्नुपर्छ।’

माता तीर्थ औंशीको अवसरमा आयोजित यो कार्यक्रमले समाजमा ज्येष्ठ नागरिकहरूप्रतिको सम्मान र हेरचाहको महत्त्वलाई झल्काएको छ। नाबुन विराटनगरले आगामी दिनहरूमा पनि यस्ता सामाजिक सेवामूलक कार्यक्रमहरूलाई निरन्तरता दिने प्रतिबद्धता जनाएको छ।