विराटनगर । नेकपा एमाले विराटनगर महानगर समितिको दोस्रो अधिवेशनको निर्वाचनलाई मध्यनजर गर्दै पार्टीभित्रको आन्तरिक शक्ति सन्तुलनमा ठूलो फेरबदल भएको छ। विराटनगर–५ का पूर्व वडाअध्यक्ष तथा एमाले नेता मिन कुमार आचार्यले गुट परिवर्तन गर्दै संस्थापन समूहलाई सघाउने घोषणा गरेका छन्।

यसअघि विनोद ढकालको नेतृत्वमा रहेको प्यानलमा सक्रिय रहेका आचार्यले अन्तिम समयमा संस्थापन पक्षको समर्थनमा उभिने निर्णय लिएका हुन्। उनले बुधबार हुने निर्वाचनमा संस्थापन पक्षका उम्मेदवारलाई सघाउने जनाउँदै सार्वजनिक रूपमा आफ्नो धारणा स्पष्ट पारेका छन्।

संस्थापन समूहबाट अध्यक्षमा रोहित कोइराला, उपाध्यक्षमा राम पोखरेल, सचिवमा नवराज काफ्ले, उपसचिवमा चन्द्रशेखर विश्वास, र महिला उपसचिवमा कला डाँगीको उम्मेदवारी घोषणा भइसकेको छ।

षड्यन्त्रपूर्वक उम्मेदवारी रोक्ने प्रयास
आज सार्वजनिक गरिएको विज्ञप्तिमा आचार्यले आफूलाई केन्द्रका नेताहरु युवराज बास्कोटा र विनोद ढकालको सल्लाहमा अध्यक्ष पदका लागि प्रतिनिधिको रूपमा चयन गरिएको उल्लेख गरेका छन्। तर पछिल्ला दिनहरूमा पार्टीभित्रैका केही व्यक्तिहरूले षड्यन्त्रपूर्वक आफूलाई उम्मेदवार बन्नबाट रोक्ने प्रयास गरेको आरोप लगाएका छन्।
उनले विनोद ढकाल, सागर थापा र वलराम गिरीको नेतृत्वमा रहेको समूहले आफ्नो विरुद्धमा भ्रामक र आधारहीन आरोपहरू लगाएर राजनीतिक र सामाजिक चरित्र हत्या गर्ने प्रयास गरिरहेको पनि बताएका छन्।
“सामान्य विषयलाई जघन्य अपराध सरह प्रस्तुत गरी मलाई उम्मेदवार बन्न नदिने प्रयासप्रति म गम्भीर आपत्ति जनाउँछु,” उनले जारी गरेको विज्ञाप्तीमा उल्लेख छ ।

आचार्यले आफूविरुद्ध नियोजित ढंगले गरिएको षड्यन्त्रलाई पार्टी विध्वंस गर्ने कार्यको संज्ञा दिँदै, अबदेखि आफू त्यस्ता गुटबाट पूर्ण रूपमा अलग भएको घोषणा गरेका छन्। उनले एमालेको संस्थापन पक्षमै अडिग रहने प्रतिबद्धता जनाउँदै पार्टीभित्रका सबै स्वाभिमानी नेता, कार्यकर्ता तथा शुभेच्छुकलाई विध्वंसकारी प्रवृत्तिको बहिष्कार गर्न आह्वान गरेका छन्।

आचार्यको यो निर्णयले विराटनगरको एमाले राजनीतिमा महत्वपूर्ण मोड ल्याउने विश्लेषण गरिँदैछ। निर्वाचनको पूर्वसन्ध्यामा यस्तो गुट परिवर्तनले आगामी नेतृत्व चयनमा नयाँ समीकरण सिर्जना गर्न सक्ने अनुमान गरिएको छ।
अधिवेशनमा १९ वटा वडाबाट प्रत्यक्ष रूपमा चुनिएका २२० प्रतिनिधि, जनसंगठनहरूबाट ७९ प्रतिनिधि र थप मनोनित १५ प्रतिनिधि गरी कुल ३१५ मतदाता सहभागी हुनेछन्।