विराटनगर । विराटनगर – ९ स्थित बिराट क्याम्पस (सोम्स) मा महिला पुनर्स्थापना केन्द्र (ओरेक) को ३४औं स्थापना दिवसको अवसरमा लैंगिकता र समाज विषयक संवाद श्रृंखलाको सुरुवात गरिएको छ।
क्याम्पस प्रमुख रोशन घिमिरेको प्रमुख आतिथ्यतामा आयोजित कार्यक्रममा कक्षा ११ र १२ का ५० जना विद्यार्थीहरूको सहभागिता रहेको थियो। कार्यक्रमको सुरुवातमा ओरेक मोरङ र कोशी प्रदेश प्रमुख शोभा वजगाँईले संस्थाको संक्षिप्त परिचय दिँदै समाजमा लैंगिकताको अवधारणाले पार्ने प्रभावबारे छलफल गराइन्।

कार्यक्रममा विद्यार्थीहरूलाई विभिन्न समूहमा विभाजन गरी लिङ्ग र लैंगिकतासम्बन्धी विषयमा मेटा(कार्डमा शीर्षकहरू लेख्न लगाइएको थियो। समूहगत छलफलपछि प्रतिनिधिहरूले आफ्नो निष्कर्ष कक्षामा प्रस्तुत गरे।
विराट क्याम्पसकी शिक्षिका तथा कार्यक्रम संयोजक दीपिका शर्माले विद्यार्थीहरूसँग आगामी संवाद श्रृंखलाको विषयबारे सुझाव लिने जानकारी गराइन्। क्याम्पस प्रमुख घिमिरेले उक्त कार्यक्रम प्रभावकारी भएको बताउँदै यस्ता कार्यक्रमले विद्यार्थीहरूको व्यवहारिक ज्ञानको विकासमा समेत योगदान पुर्‍याउने बताए।

कार्यक्रमको अन्त्यमा विद्यार्थीहरूलाई बेलुन खेल मार्फत समाजमा रहेको शक्ति संरचना र शक्ति गतिशीलता पावर डायनामिक्स बारे प्रयोगात्मक शिक्षा प्रदान गरिएको कार्यक्रम संचालक घिमिरेले जानकारी दिए।