विराटनगर । प्रथम कोशी खेलकुद महोत्सव – २०८१ को तयारी पूरा भएको छ । कोशी प्रदेश खेलकुद विकास बोर्डले आइतबार पत्रकार सम्मेलन गर्दै फागुन १३ गते देखि १८ गते सम्म संचालन हुने खेल महोत्सवको तयारी पूरा भएको जानकारी गराएको हो ।
खेलकुद महोत्सवमा कोशी प्रदेशका १४ वटै जिल्लाका खेलाडीको सहभागिता हुने कोशी प्रदेश खेलकुद विकास बोर्डका सदस्य सचिव कृष्ण बस्नेत ( पर्शुराम ) ले जानकारी दिए । नियमित खेलकुद प्रतियोगिताले खेलाडीको प्रतिभामा निखार ल्याउने उनले बताए । खेल गतिनै खेलाडीको प्रगति हो भन्ने मान्यता साथ खेलकुद विकास बोर्डले प्रतियोगिताहरु गर्दै आएको बस्नेतले बताए ।
कोशी प्रदेशका सामाजिक विकास मन्त्री तथा बोर्डका अध्यक्ष पाँचकर्ण राईले प्रदेश सरकारले खेलकुदलाई प्राथामिकतामा राखेको बताए । कोशी प्रदेशलाई १० औं राष्ट्रिय खेलकुद प्रतियोगितामा अधिक पदक जित्न सहयोग पुग्ने उद्देश्यले यो खेलकुद महोत्सवको गरिएको बताए । राईले नियमित खेलकुद प्रतियोगिताले खेलाडीको जीवन निर्वाहमा समेत महत्वपूर्ण भूमिका खेल्ने बताए । ‘खेलाडीले खेलेरै जीवनयापन गर्न सक्ने अवस्था सिर्जना गर्न सबैपक्ष लाग्नु पर्दछ,’ उनले भने ।
महोत्सवमा प्रदेशस्तरीय महिला फुटबल , महिला तथा पुरुष दौड , महिला तथा पुरुष कब्बड्डी , भेट्रान बाघचाल , महिला तथा पुरुष टेबलटेनिस , महिला तथा पुरुष बुद्धिचाल , महिला तथा पुरुष कराते , महिला तथा पुरुष तेक्वान्दो र पुरुष सफ्टटेनिस र डोरीतान लगायतको खेलकुद प्रतियोगिता समावेश छन् । महोत्सव आयोजना गर्न झन्डै १ करोड ७८ लाख खर्च हुने अनुमान गरिएको छ ।