विराटनगर । मंसिर १६ गते हुने मोरङको ग्रामथान गाउँपालिकाको अध्यक्ष पदको उपनिर्वाचनलाई लक्षित गरी जिल्ला प्रशासन कार्यालय मोरङले सवारीसाधन आवतजावतमा रोक लगाएको छ । उपनिर्वाचनलाई स्वच्छ, स्वतन्त्र, निष्पक्ष, शान्तिपूर्ण र भयरहीत वातावरणमा सम्पन्न गर्नका लागि यो निर्णय गरिएको हो ।

सहायक प्रमुख जिल्ला अधिकारी विनोद कुमार पोखरेलद्वारा जारी सूचनामा मङ्सिर १५ गते राति १२ ः ०० बजेदेखि मङ्सिर १६ गते मतदान कार्य सम्पन्न नभएसम्म जिल्ला सुरक्षा समितिको निर्णयअनुसार मोरङ जिल्लाको ग्रामथान गाउँपालिकाको सबै स्थान र पालिका छिर्ने निम्न स्थानबाट सबै किसिमका सवारी साधनलाई अत्यावश्यक सेवा र अनुमति प्राप्त सवारी साधन बाहेक ग्रामथान गाउँपालिका क्षेत्रतर्फ प्रवेश गर्न रोक लगाइएको उल्लेख छ । यो सूचनाको परिपालना नगरेमा सवारी साधन नियन्त्रणमा लिई कानुन बमोजिम कारबाही हुने जानकारी गराइएको छ ।