विराटनगर । मोरङको बुढीगंगा गाउँपालिका ४ स्थित मनमोहन प्राविधिक विश्वविद्यालयबाट चेक चोरी गरि लाखौ रुपैयाँ झिकेको आरोपमा प्रहरीले दुई जनालाई पक्राउ गरेको छ ।

पक्राउ पर्नेमा राजविराज–६ सप्तरीका सुमित सागर यादव र टंकप्रसाद यादव छन् ।
उनीहरूले एकाउन्ट शाखाबाटै १२ पिस चेक चोरी गरेको आरोप छ । जसमध्ये ६ वटा चेकमा लेखा अधिकृत जानकी लेखी र कार्यालय प्रमुख सुदिप अधिकारीले हस्ताक्षर गरेका थिए । उक्त चेकबाट विद्यार्थीद्वय यादवले २ लाख ६६ हजार ६९२ रुपैयाँ निकालेको प्रमाणित भएको मोरङ प्रहरीले जनाएको छ । हस्ताक्षर गरेको चेक सकिएपछि आफैं किर्ते गरेर बैंक गएपछि भने उनीहरुमाथि शङ्का लागेर बैंकले विश्वविद्यालयलाई जानकारी दिएको थियो ।
मोरङका प्रहरी प्रवक्ता प्रहरी नायव उपरीक्षक वेद प्रकाश जोशीले लेखा अधिकृतको टेबुलमा कसैलाई दिन भनेर तयार पारेको चेक चोरी भएको पाइएको बताए । ‘कार्यालय प्रमुखको हस्ताक्षर गर्न बाँकी थियो । यि विद्यार्थीहरु लेखामा आउने जाने गरिरहन्थे । उनीहरुले १२ वटा चेक चोरेछन् । ६ वटामा हस्ताक्षर गरेको चेक थियो । त्यसपछि उनीहरुले चेक साटे । पछि आफैं हस्ताक्षर गर्दै चेक काटेर पैसा निकाल्ने प्रयास गरेको रहेछ । त्यसपछि बैंकले थाहा पाएपछि उनीहरुबारे विश्वविद्यालयमा जानकारी आयो र उनीहरु पक्राउ परे,’ जोशीले भने ।
बुधबार उनीहरुलाई पक्राउ गरेर चेक चोरीको केसमा म्याद थप गरि अनुसन्धान भइरहेको उनले बताए । ‘गत आइतबार चेक साटिएको भन्ने कुरा आएको छ । सायद चेक चोरी पनि त्यही दिन भएको हुनसक्छ,’ जोशीले भने, ‘उनीहरुले आफ्नो अपराध स्वीकार गरिसकेका छन् । प्रमाणले पनि देखाइसकेको छ । अहिले चेक चोरी र किर्तेमा मुद्दा जानसक्छ । अहिले चेक चोरी चोरीको अभियोग नै मुख्य रुपमा रहने भयो ।’
उता विश्वविद्यालय स्रोतले भने चेक चोरीमा लेखा अधिकृतकै संलग्नता हुनसक्ने दाबी गरेको छ । ‘चेक चोरीको विषयमा जानकारी आएपछि पनि विश्वविद्यालय पदाधिकारीले नै प्रहरीलाई नै अनुसन्धान गर्नमा रोक लगाएको थियो । तर, अन्तिम समयमा निमुवा प्रहरीले थाहा पाएर कडाइ गरेपछि विद्यार्थी पक्राउ गर्यो,’ उक्त स्रोतले भन्यो, ‘१० दिन अगाडि नै चेक हराएको हो । न दराज टुटेको छ, न ढोका फुटेको छ । मिलेमतो हुनसक्छ । छाप पनि चोरी गरेको हुनसक्छ । त्यति समयसम्म चेक हराएको विषयमा बैंकलाई जानकारी पनि दिइएन ।’
चोरी भएको चेक राष्ट्रिय वाणिज्य बैंकको हो । चेक हराएको विषयमा विश्वविद्यालयले बैंकलाई समेत जानकारी दिएको थिएन । उक्त विषयमा कार्यालय प्रमुख अधिकारीले भने आफूहरुलाई चेक हराएको विषयमा एकैचोटी आइतबार मात्रै थाहा भएको बताए । ‘चेक हराएको थाहा भएपनि चोरी भएको विषयमा भने थाहा नहुँदा बैंकलाई जानकारी नदिएको हो,’ उनले भने । पक्राउ परेका दुई विद्यार्थीलाई भने जिल्ला प्रहरी कार्यालय मोरङको हिरासतमा राखिएको छ । उक्त चेकमा हस्ताक्षर गर्ने लेखा प्रमुख बोर्ड अफ जस्टिज सत्यनारायण चौधरीकी श्रीमती जानुका लेखी हुन् ।