विराटनगर । जिल्ला ट्राफिक प्रहरी कार्यालय मोरङले सडक सुशासन र सवारी दुर्घटना र न्यूनीकरणको लागि सिटी सफारी चालक र ठेला चालकहरुलाई ट्राफिक सचेतना अभियान सुरु गरेको छ ।
पछिल्लो समय सिटी सफारीले ट्राफिक नियमको उल्लङ्घन गरी सवारी दुर्घटना बढ्न थालेपछि मोरङ ट्राफिकले सचेतना अभियानलाई तिव्रता दिएको हो ।

अभियान अन्तर्गत विराटनगरमा सिटी सफारी चालकलाई र सडकमा व्यापार गर्ने ठेला चलाउनेहरुलाई भेला पारेर ट्राफिक सचेतना मूलक जानकारी गराएको जिल्ला ट्राफिक प्रहरी कार्यालय मोरङका प्रमुख ट्राफिक प्रहरी निरीक्षक राजन लम्सालले जानकारी दिए । ‘सडक सुशासन र सवारी दुर्घटना न्यूनीकरणको लागि ट्राफिक प्रहरी अभियानको थालनी भएको छ,’ ट्राफिक प्रहरी निरीक्षक लम्सालले भने, ‘अहिले बजार क्षेत्र सिटी सफारीले ट्राफिक नियमको पालना नगर्दा अस्तव्यस्त रहेको छ । ट्राफिक व्यवस्थपनलाई सहज बनाएर दुर्घटना न्यूनिकरण गर्नको लागि अभियान सुरु गरिएको हो । ’
सिटी सवारी चालक तथा सडक प्रयोगकर्ताहरूलाई प्रशिक्षण दिई सडक अनुशासनको पालना गराउने उनले बताए ।
‘सडक प्रयोगकर्ताहरूलाई अनुशासित तवरले सवारी साधन चलाउन लगाएर सम्भवयताको सँगसँगै सवारी दुर्घटनाबाट हुने जनधनको क्षतिलाई कम गराउने यो अभियानको एउटा उद्देश्य पनि हो,’ उनले भने, ‘अभियानको क्रममा सडक प्रयोगकर्ताहरूलाई सवारी तथा यातायात व्यवस्था ऐनमा भएका नियम र ऐनको जानकारी गराएर सजक गराइन्छ ।’
सडक सुशासन तथा दुर्घटना रहित समाजको निमार्णको लागि सुरक्षा, सजकता र जिम्मेवार समेटेर अभिभावक शिक्षा कार्यक्रम पनि सञ्चालन गरिने बताइएको छ ।