विराटनगर । कोशी प्रदेशको सबैभन्दा ठूलो सरकारी अस्पतालको एनआइसियू बन्द भएको दुई वर्षभन्दा बढी समयपछि सुचारू भएको छ । अस्पतालको आकस्मिक कक्ष माथिको भवनमा शुक्रबार एक कार्यक्रमको आयोजना गरी बन्द भएको लामो समयपछि पाँच शैय्याको एनआइसियू सुचारु गरेको हो ।

एनआइसियू सेवा कोशीमा बन्द रहदा सर्वसाधरणले चर्को शुल्क लिएर निजी हस्पिटल जान बाध्य रहेका थिए । ठाउँ अभाव र दक्ष जनशक्ति नभएको देखाउँदै कोशी अस्पताल प्रशासनले दुई वर्ष अगाडीदेखि एनआइसियूको उपकरणहरू स्टोरमा थन्काएर सेवा ठप्प पारेको थियो । अब एनआइसियू सेवा सुचारु भएपछि विरामीलाई सहजता भएको कोशी अस्पतालको मेसु डा. रविराज सिंहले बताए । थप जनशक्ति व्यवस्थापनमा ध्यान दिएर अगाडी बढने उनले बताए । ‘अहिले पनि जनशक्ति अभाव रहेको छ । विकास समितिबाट थप व्यवस्थापन गरेर एनआइसियूलाई व्यवस्थित गरेर अगाडी लैजानेछौं,’ उनले भने ।
अस्पतालको पेडयाडिक वार्ड ३२ बेडको संचालनमा रहेको छ । अहिले संचालन गरेको एनआइसियूमा मेडिकल अपिसर र स्पाट नर्स अभाव रहेको कोशी अस्पतालका बच्चा विभागका प्रमुख डा. रामनारायण चौधरीले बताए ।