विराटनगर । पाँचौ संस्करणको विद्यालयस्तरीय विराटनगर बास्केटबल प्रतियोगिताको उपाधि बिकेभिएस र अरनीको स्कुलले जितेको छ । एभरेष्ट स्कुलको बास्केटबल कोर्टमा आइतबार सम्पन्न भएको फाइनलमा पुरुषतर्फ विकेभीएम र महिलातर्फ अरनिको स्कुलले उपाधि जितेको हो ।
पुरुषतर्फको फाइनल खेलमा विकेभीएमले सगरमाथा स्कुललाई ५६–३५ अंकले पराजित गर्दै उपाधि हात पारेको छ । त्यसैगरी एभरेष्ट स्कुल तृतीय भयो ।
महिलातर्फ अरनिकोले विकेभीएम स्कुललाई २६–२४ अंकले पराजित गर्दै उपाधि जितेको छ । एभरेष्ट स्कुल तृतीय भएको छ ।
प्रतियोगिताको उत्कृष्ट खेलाडी पुरुषतर्फ विकेभीएमका आकाश यादव र महिलातर्फ अरनिको स्कुलकी नोभा ओझा घोषित भईन् । उनीहरुले ट्रफी र दुई हजार ५ सय रुपैया नगद पुरस्कार पाए । सगरमाथाका नविन मेहेता र महिलातर्फ विकेभीएमकी गीता खड्का उदयमान खेलाडी घोषित भईन् । डिफेन्सीप खेलाडी सगरमाथाका आलोक यादव र एभरेष्ट स्कुलकी आयुषा भेटवाल भईन् ।
प्रतियोगिताको विजेता र उपविजेतालाई ट्रफी, मेडल र प्रमाण पत्र नेपाल बास्केटबल संघको केन्द्रीय उपाध्यक्ष विनायक कान्त पन्त,मोरङ बास्केटबल संघका उपाध्यक्ष अनिल राई,तेज राज गिरी,नवनित प्रधान, सरोज बस्नेत, सागर ढुंगाना, अनुभव दाहाल लगायतले वितरण गरेका थिए ।
विराटनगर बास्केटबल एकेडेमीको आयोजनामा भदौ ९ गतेदेखि ३० गतेसम्म संचालन भएको प्रतियोगितामा पुरुषतर्फ ६ वटा र महिलातर्फ ५ वटा विद्यालयले भाग लिएका थिए ।