विराटनगर । अस्पतालबाट उपचारको क्रममा कैदी फरार भएपछि दुई जना प्रहरीलाई निलम्बन गरेर प्रहरीले अनुसन्धान सुरु गरेको छ ।
डियुटिमा खटिएका जिल्ला कारागार मोरङमा कार्यरत प्रहरी सहायक हल्लदार राजिव भण्डारी र प्रहरी जवान ज्ञानेन्द्र कटुवाललाई निलम्बन गरी प्रहरीले अनुसन्धान सुरु गरेको हो ।

उनीहरुलाई विराटनगरस्थित कोशी अस्पतालबाट फरार भएको विराटनगर–८ घर भएका २३ वर्षीय आर्यन महमद अहमद खान भनिने मोहमद अहमद फरार भएकै दिन १७ साउनदेखि निलम्बन गरी कारागार ऐन २०७९ बिपरीतको कसुर मुद्दामा मोरङ अदालतमा म्याद थप गरी अनुसन्धान सुरु गरिएको एसपी नवराज कार्कीले जानकारी दिए । कैदी भागे भगाएको मुद्दामा तीन वर्षसम्म कैद र ३० हजार रुपैयाँसम्म कैद साजय हुने व्यवस्था रहेको छ ।

कैदी फरार भएको घटनामा छानविन समिति पनि गठन भएको छ । मोरङ प्रहरीका डिएसपी ज्ञानेन्द्र बहादुर बस्नेत नेतृत्वको छानविन समिति गठन भएर अहिले छानविन भइरहेको एसपी कार्कीले बताए । ‘छानविन समिति बनेर पनि छुट्टै अनुसन्धान भइरहेको छ । अनुसन्धान पुरा भएपछि प्रतिवेदन आएपछि मात्रै प्रहरीको कैदी फरार प्रकरणमा लापरवाही भए नभएको खुल्नेछ,’ उनले भने, ‘त्यस विषयमा प्रतिवेदन आएपछि मात्रै भन्न मिल्छ ।’