विराटनगर । तेस्रो संस्करणको मिल्स कप टि –२० क्रिकेट प्रतियोगितामा बुधबार भएको दोस्रो खेलमा सुनसरी क्रिकेट क्लब अन्तिम आठमा पुगेको छ । सुनसरी क्रिकेट क्लबले आयोजक मिल्स क्रिकेट क्लबलाई ११ रनले हराउँदै अन्तिम आठमा पुगेको हो ।

सुनसरी क्रिकेट क्लबका खेलाडी रविन मण्डलको आक्रमक ब्याटिङ र बलर प्रकाश कार्कीको कसिलो बलिङ गरे । रविनले ४७ बलमा अर्धसतक ८८ रन कटाउँदै निर्धारित २० ओभरमा ९ विकेट गुमाई १६६ रन बनाएको हो । प्रकाशले ४ ओभरमा १२ रन खर्चेर ४ विकेट लिए ।
सुनसरीका सविन यादवले १८ बलमा २९ रन पारी खेल्दा समिरले १२ रनको योगदान दिए । मिल्स क्रिकेटको तर्फबाट गुल्सन कुमार राजले ४ ओभरमा १५ रन खर्चेर ४ विकेट लिए । पुस्कर झाले ४ ओभरमा २० रन खर्चेर ३ विकेट र रितेस सिंहले १ विकेट लिए ।
१६७ रनको विजय लक्ष्य पछ्याएको आयोजक मिल्स क्रिकेटले १८.२ ओभरमा १० विकेट गुमाई १५५ रन मात्रै बनायो । जसमा कुमारले ३१ बलमा अर्धसतक कटाउँदै ७१ रन बनाए । झोला साहले २५ बलमा ३० रन ल्याउँदा बुद्रा कुमारले २४ रन बनाए ।
सुनसरीका बलर भुपाल लुईटेलले २ विकेट लिए । बिपोस्टिङ बलिङ गर्ने सुनसरीका प्रकाश खेलको प्लेर अफ द म्याच घोषित भए । उनले नगद तीन हजार पाए ।
बिहीबारको पहिलो क्वाटर फाइनल खेल जोगवनीको प्रशान्त क्रिकेट क्लब र विराटनगरको एनबीएससी क्रिकेट क्लब बिच हुने तालिका छ ।