विराटनगर । विराटनगरको हिमालय रोडमा फोटो प्रर्दशनी आयोजना गरिएको छ । कोशी प्रदेशका पर्यटकीय स्थलहरू फोटो प्रदर्शनीमा राखिएको छ । पर्यटनको प्रवर्द्धन गर्ने उद्देश्यले फोटो प्रदर्शनी गरिएको हो ।

विराट पर्यटन महोत्सवमा चार दिने फोटो प्रर्दशनी राखिएको हो । उक्त फोटो प्रर्दशनी सोमबारसम्म संचालन हुने छ ।
पर्यटकीय गन्तब्यहरूको एक सय वटा फोटोहरु प्रर्दशनीमा राखिएको पर्यटन व्यवसाय कोशी प्रदेश पर्यटन तथा हवाइ यातयत समिति संयोजक भविस कुमार श्रेष्ठले जानकारी दिए । कोशी प्रदेशमा रहेको पर्यटकीय गन्तब्यहरुलाई चिनाउन यस्तो प्रर्दशनीले ठूलो सहयोग पुग्ने अध्यक्ष श्रेष्ठले बताए ।

फोटोहरू कोशी प्रदेशका चर्चित धार्मिक तथा पर्यटकीय क्षेत्रहरूको रहेको छ । ‘हामीले विराटनगरमा गरेको फेस्टिभलको माध्यमाबाट फोटो प्रदर्शनीमा ल्याएका हौँ, उनले भने, यी फोटो प्रदर्शनीहरू कोशी प्रदेश बाहिरका अरू प्रदेश, सङ्घीय राजधानी र भारत तथा अन्तर्राष्ट्रिय रूपमा अरू देशहरूमा पनि पु¥याउने तयारी गरिएको छ ।’ विराट एसोसिएसन अफ ट्राभल्स एजेन्टले विराटनगरमा चार दिने विराट पर्यटन महोत्सवको आयोजना गरेको हो ।

मेलामा सांस्कृतिक नृत्य, फोटो प्रदर्शन र खानाका परिकारहरू राखिएको छ । कार्यक्रममा कोशी प्रदेश पर्यटन वन तथा वातावरण मन्त्रालयका सचिव विशाल घिमिरेले कोशी प्रदेश पर्यटनको प्रशस्त सम्भावना रहेको बताए । पर्यटन भनेको नागरिकले अनुभूति गर्ने विषय भएकोले सबै मिलेर कोशी प्रदेशको पर्यटनको विकास गर्न लाग्नु पर्नेमा जोड दिए ।