विराटनगर । मोरङ कटहरी गाउँपालिकाका अध्यक्ष देवराज चौधरीले पार्टीका नेताहरूलाई बेवास्ता गरेको र उनीहरूको कामलाई असहयोग गरेको भन्दै कारवाहीको माग राखेका छन् ।

गाउँपालिकाभित्र रहेका क्षेत्रीय र प्रदेश प्रतिनिधि, पालिका सभापतिसहित पदाधिकारी, सातवटै वडाका सभापतिसहितको शनिबार बसेको संयुक्त बैठकले यस्तो निर्णाय गरेको हो ।
अध्यक्ष चौधरीलाई पार्टीले कारवाही नगरे नेपाली कांग्रेसका जिम्मेवार पालिकास्तरका नेताहरूले सामुहिक राजीनामा दिने निर्णय पनि गरेको छ ।

नेपाली कांग्रेसका उम्मेदवार भई कटहरीको अध्यक्षमा निर्वाचित भएदेखि चौधरीले पार्टीका नेताहरूलाई बेवास्ता गरेको र उनीहरूको कामलाई असहयोग गरेको अध्यक्ष चौरधीमाथि आरोप लगाएको छ । बैठकले हुलाकी राजमार्गमा संघर्ष समितिसँगको सम्झौता अनुसार काम नभएर दुर्घटना हुने गरेको, पार्टी गाउँपालिका उपसभापति गोकर्ण भट्टराईसँग भ्रमणका लागि भन्दै आर्थिक सहयोग माग गरेको निर्णयमा उल्लेख छ ।
रकम नदिएकाले कटहरीका कर्मचारी रहेका भट्टराईका भाइको जागिर खाइदिने धम्की दिएको, कटहरी पार्टी सभापति रामकुमार कामतकी छोरीको सरूवा गरेको, वडा पार्टी सभापति संजय मण्डलको कामलाई अवरोध गरेको, पार्टी प्रदेश प्रतिनिधि गणेश मुखियाको ट्याक्टर नियन्त्रणमा लिएर दैनिक ५ हजार रूपैयाँको क्षति गरेको आरोप चौधरीलाई पार्टीले लगाएको छ ।
हुलाकी सडकमा भएको दुर्घटनाको बिरोधमा रहेका ११ जनालाई मुद्दा चलाएको, अंग्रेजी माध्यमको शिक्षाका लागि नियुक्त शिक्षक हटाएको, प्रमुख प्रशासकीय अधिकृत मनोज साहसँग मिलेर आर्थिक चलखेल गरेको, हुलाकी राजमार्ग र रेलवेमा हटिया लगाएर आफन्त मार्फत अवैध रकम उठाउने गरेकाले चौधरीलाई कारवाही हुनु पर्ने पार्टीले निर्णय गरेको छ ।
चौधरीले बुहारीलाई कर्मचारीमा नियुक्त गरेको बिरूद्ध अख्तियार दुरूपयोग अनुसन्धान आयोगमा पनि उजुरी दिने बैठकले निर्णय गरेको छ । बैठकले वार्षिक ४० लाख रूपैयाँमा ठेक्का लाग्ने गरेको हटिया हटाउन चौधरीले नेपाल प्रहरी र सशस्त्र प्रहरी मार्फत दमन गराएको निर्णय गर्दै कारवाहीका लागि माग गरेको नेपाली काँग्रेस कटहरी गाउँपालिका २ का वडा सभापति सन्जय मण्डलले बताए ।
बैठकमा नेपाली कांग्रेस मोरङका कार्यबाहक सभापति भक्ति माझी, क्षेत्रीय सभापति विनोद बस्नेत, जिल्ला सदस्य गोपाल साहलगायत सहभागी थिए ।