विराटनगर । विराटनगरका हिन्दु मुस्लिम समुदायका ब्यापारीहरुले धार्मिक एकताको सन्देश दिन अष्टजाम सुरु गरेका छन् । विराटनगर ११ स्थित नयाँ गुद्री बजारमा मुलुकमा धार्मिक एकताको सन्देश दिन हिन्दु मुस्लिम मिलेर अष्टजाम गरेका हुन् ।
हिन्दु धर्मालम्वीहरुको पवित्र पर्व महाशिवरात्रीको अवसरमा उनीहरुले एक भएर ७२ घण्टे अष्टजाम सुरु गरेका छन् । पछिल्लो क्रममा मुलुकको विभिन्न स्थानमा धार्मिक एकता खलबल्याउन विभिन्न समुह सक्रिय भएर लागेकाले विराटनगरमा धार्मिक एकताको सन्देश दिन अष्टजाम सामुहिक रुपमा सुरु गरेको सब्जी मण्डी तथा गुद्धी बजार व्यबस्थापन समितिका सचिव साहेव अहम गुड्डुले जानकारी दिए ।

आपसी भाईचारा र धार्मिक सहिष्णुता अभिवृद्धी गरी मुलुकमा दिगो शान्ति र जनभावना अनुसारको राजनीतिक स्थिरताको कामनाका लागि ७२ घण्टे अष्टजाम सुरु गरेको उनले बताए । समाजमा बिभिन्न धर्मालम्वीहरु रहेकाले कुनै धार्मिक भावना माथी ठेस पुग्ने काम गर्ने नहुने र प्रत्येक धर्म ,रिती रिवाजलाई संरक्षण गर्न, एक आपसमा सहयोग गर्ने भावना जागृत गराई आपसी भाईचारलाई झन् बलियो बनाउन सन्देश दिन अष्टजाम आयोजना गरिएको समितिका सचिव तथा अष्टजाम उपसमितिका प्रमुख सल्लाहकार साह्व अहमद गुडु (मियाँं)ले बताए । राजनैतिक स्वार्थ पुरा गर्ने समाजमा जात तथा धर्मको नाम हुने गरेको धार्मीक सम्प्रदायिक विभेद अन्त गर्न तथा अराजकता मचाउने तत्वलाई निस्तेज पारी मुलुकमा शान्तिको स्थापना गर्न अष्टजामको आयोजना गरिएको गुड्डु (मियाँ)ले बताए । गुद्रीका व्यापारीहरको सामुहिक निर्णयबाट आयोजना हुने सो अष्टजाम हिन्दु धर्मको परम्परा तथा रितिरिवाज वाट हुने गरेको छ । हिन्दु र मुस्लिम एकै साथ प्रसाद वितरण गर्ने गरेका छन् ।
गुद्री बजार व्यवस्थापन समितिका अध्यक्ष पशुपति भगतका अनुसार अष्टजाम सम्पन्न गर्न ७ लाख भन्दा बढि रकम खर्च हुने छ । विराटनगर–११ को नयाँ गुद्री बजारमा ठूला, मझौला र साना गरेर २०५ भन्दा बढि पसल सञ्चालनमा रहेका छन् ।