विराटनगर । विराटनगरमा रहेको रहेको पोखरीया उच्च माविलाई देशभरीकै उत्कृष्ट सामुदायिक विद्यालय भएको भन्दै सम्मान गरिएको छ । केन्द्रबिन्दु डटकमले आइतबार काठमाडौंमा आयोजना गरेको एक विशेष कार्यक्रमकाबीच पोखरीया माविलाई देशभरीकै उत्कृष्ट सामुदायिक विद्यालय भन्दै सम्मान गरिएको हो ।

पोखरीया स्कुलले शिक्षा क्षेत्रमा योगदान पुर्याउँदै आएको योगदानको उच्च सम्मान गर्दै केन्द्रबिन्दुले उक्त अवार्ड प्रदान गरेको हो । यसअघि पनि विराटनगर महानगरपालिकाले पोखरीया स्कुललाई एइइ परीक्षामा उत्कृष्ट नतिजा ल्याएको भन्दै विद्यार्थी र विद्यालयका प्रधानध्यापक खेमराज भट्टराईलाई सम्मान गरिएको थियो ।

प्लस टुसम्मको अध्ययन हुने यो स्कुलमा विज्ञान, व्यवस्थापन, कम्प्युटर इन्जिनियरिङ्ग र शिक्षा संकायमा अध्यापन हुँदै आएको छ । सक्षम नेतृत्व, कुशल व्यवस्थापन र मेहनती शिक्षक शिक्षिकाहरुका कारण यो विद्यालयमा छोराछोरी पढाउने धेरै अभिभावक लालायित हुने गरेका छन् ।

विद्यार्थीको चाप बढेपछि विद्यालयले नयाँ भर्ना हुने विद्यार्थी संख्याको सीमा तोकेर प्रवेश परीक्षा लिन थालेका छन् । यहाँ पढ्न चाहनेजति सबैलाई भर्ना गर्न सक्ने स्थिति नै हुँदैन, विद्यार्थीको चापका कारण प्रवेश परीक्षा लिएर त्यसको रिजल्टका आधारमा मात्रै भर्ना लिन थालेका हौंं,’ प्रअ खेमराज भट्टराईले भने, ‘प्रवेश परीक्षा उत्तीर्ण गर्न नसक्नेलाई जो कसैले भनसुन गरे पनि भर्ना लिन्नौं ।’

अंग्रेजी माध्यमबाट पढाइ गर्दै उत्कृष्ट नतिजा दिँदै आएको यो विद्यालयले भर्ना लिन कक्षा ६ देखि ९ सम्म पनि विद्यार्थीको भिड लाग्ने गरेको छ ।