विराटनगर । मलेसियामा हुने अन्तर्राष्ट्रिय आइटिएफ तेक्वान्दो प्रतियोगितामा भाग लिन जाने एक जना महिला खेलाडीलाई बिदाइ गरिएको छ ।
फागुन १७ देखि फागुन २० गतेसम्म हुने ‘हवारङ वाररिअर आइटिएफ तेक्वान्दो वल्र्ड च्याम्पियनसिप’मा भाग लिन जान लागेकी सजिना तामाङलाई बिदाइ गरिएको हो ।

मोरङ क्षेत्र नम्बर ४ का प्रदेशसभा सदस्य जयप्रकाश चौधरी र कोशी खेलकुद विकास बोर्डका सदस्य सचिव हंसराज वाग्लेले सयुक्त रुपमा भोजपुर घर भएकी तामाङलाई बिदाइ गरेका हुन् ।
तामाङलाई शुभकामना दिँदै उनीहरुले कोशी प्रदेश सरकार खेल र खेलाडीप्रति उत्तरदायी भएर लागेको बताए । खेलाडीहरु आफ्नै लगानीमा खेलको अभ्यास गरेर राष्ट्रका लागि खेल्ने गरेको हुँदा सबै पक्षले खेलकुदको विकासमा विशेष ध्यान दिन जरुरी रहेको बताए ।

खेलाडीहरु स्वदेश वा विदेशमा हुने प्रतियोगितामा भाग लिन जाँदा आफ्नो खर्च गरेर जानु पर्ने अवस्थाको अन्त्य गर्न सरकारले विशेष योजना ल्याउनु पर्ने बताए । ‘कुनै पनि प्रतियोगिता खेल्न जाने खेलाडीको स्रोत सुनिश्चित हुनुपर्छ अर्थात उनी जाने आउनेका साथै बस्ने र खाने राम्रो बन्दोवस्त भए खेलाडीले राम्रो खेल प्रदर्शन गर्न सक्छन्, ’ सदस्यसचिव वाग्लेले भने, ‘प्रदेश खेलकुद बोर्डले खेल र खेलाडीको प्रवद्र्धनका लागि राष्ट्रिय वा अन्तर्राष्ट्रिय प्रतियोगितामा पदक विजेताहरुलाई सम्मान गर्ने प्रचलनमा ल्याएको हौं । देशमै पहिलो पटक हाम्रो बोर्डले हाम्रो प्रदेशका खेलाडीहरुलाई गतवर्ष पदकका आधारमा नगदका साथै सम्मानपत्रले सम्मान ग¥यौं । उनीहरु धेरै वर्षदेखि राष्ट्रिय र अन्तर्राष्ट्रिय प्रतियोगितामा पदक जितेर मेडल थन्काउने मात्रै काम भयो । उहाँहरुलाई सरकारकोतर्फबाट हामीले योजना बनाएर सम्मान गरेका हौं ।’

नेपाल अन्तर्राष्ट्रिय आइटिएफ तेक्वान्दो महासंघका केन्द्रीय अध्यक्ष प्रवीणकुमार कार्कीका अनुसार प्रतियोगितामा तामाङसहित चार खेलाडीका साथै अम्पायर विक्रम बाठा मगर जाने छन् । खेलाडी वीरेन्द्र कुँवर, देवेन्द्र सुनार र कैलाश अर्यालले प्रतियोगितामा भाग लिने छन् ।