विराटनगर । शैक्षिक संस्थामा चन्दा आतंक मच्याएको आरोपमा दुई जनालाई पक्राउ गरेको छ । पक्राउ पर्नेमा इलाम माम्सेवुङ गाउँपालिका १ गजुरमुखी घर भइ काठमाण्डौ स्थित भिमसेनगोला डेरा गरी बस्ने ३८ वर्षीय प्रवीण मिश्र र पाँचथरको याङवरक गाउँपालिका १ का ३० वर्षीय विपिन अधिकारी रहेको मोरङ प्रहरी प्रमुख एसपी दीपक पोखरेलले जानकारी दिए ।

पक्राउ परेकाको साथबाट शैक्षिक संस्थामा चन्दा माग्न लेखिएको पत्र, नगदी रसिद र लेटरप्याट पनि बरामद भएको एसपी पोखरेलले बताए । मोरङ प्रहरीले उनीहरुलाई मंगलबार पत्रकार सम्मेलन गरी सार्वजानिक गरेको छ । भूमिगत संगठनको नाममा महासचिव महाविरको दस्तखत भएको नेपाल कम्यूनिष्ट पार्टी (माओवादी) लेखिएको लेटर प्याड प्रयोग गरि चन्दा माग गर्ने र नदिए विस्फोटक पदार्थ राखेर आतंक सृजना गर्ने गरको प्रहरीको अनुसन्धानबाट खुलेको छ ।

मंगलबार बिहान विराटनगर–३ मा भेटिएको शंकास्पद वस्तु नेपाली सेनाको टोलीले ‘डिस्पोज’ गरेको थियो । डिस्पोज गरिएको शंकास्पद बस्तु कुकर बम भएको पुष्टि भएको छ । सो घटनामा पनि उनीहरूको संलग्नता रहेको एसपी पोखरेलले बताए । प्रहरीले उनीहरुको साथबाट विस्फोटक पदार्थ बनाउने सामग्री सातवटा डेटोनेटर, १८ फिट तीन इन्च लम्बाइको तार, एक केजी सोडा पनि बरामद गरेको छ । चन्दा नदिए ध्वांसात्मक कार्य समेत गरिने भन्ने सुचनाका आधारमा पक्राउ गरिएको एसपी पोखरेलले बताए । ‘सुनसरी र झापाका शैक्षिक संघसंस्थाहरूमा चन्दा असुली गरेको सूचना थियो । उक्त समूहले झापापछि मोरङ आएको हामीले सूचना पाएका थियौं । चन्दा असुलीको पत्र पठाएको जानकारी पयौं र त्यसपछि पक्राउ गर्न विशेष प्रहरी परिचालन गरियो,’ एसपी पोखरेलले भने, ‘चन्दा नदिने शैक्षिक संस्था अगाडी पनि बिस्पोट गराउने उनीहरुको उद्देश्य थियो । त्यो हामीले पुरा हुन दिएनौं । बेलैमा सूचना पाएपछि उनीहरुलाई नियन्त्रणमा लिन सफल भएका छौं ।’ उनीहरुले विराटनगरका शैक्षिक संस्थालाई त्रसित बनाउन प्रेसर कुकर बम खाली चौरमा लुएको अवस्थामा फेला पारिएको प्रहरीले जनाएको छ ।