विराटनगर । कोशी प्रदेशका मुख्यमन्त्री केदार कार्कीले आज तेस्रो पटक मन्त्रिपरिषद विस्तार गर्दैछन् ।

मुख्यमन्त्री कार्कीले नेपाली कांग्रेसका दुई मन्त्री र एक राज्यमन्त्री तथा माओवादी केन्द्रका दुई मन्त्री थपेर मन्त्रिपरिषद विस्तार गर्न लागेका हुन् । मुख्यमन्त्री कार्कीले आज अपराह्न चार बजे नवनियुक्त मन्त्रीहरुको शपथ ग्रहण हुने बताइएको छ ।
नेपाली कांग्रेसबाट प्रदीप सुनुवार र रामकुमार खत्री मन्त्री बन्दैछन् । इन्दिरा थापा राज्यमन्त्री बन्नेछिन् । प्रदीपलाई स्वास्थ्य र रामकुमारलाई कृषि मन्त्रालयको जिम्मेवारी दिन लागिएको मुख्यमन्त्री कार्यालय स्रोतले बतायो । राज्यमन्त्री थापाको भने मन्त्रालय टुंगो लागिसकेको छैन । उनलाई स्वास्थ्य राज्यमन्त्री बनाउने तयारी गरिएको बुझिएको छ ।

यसैगरी माओवादी केन्द्रबाट उदयपुरका नारायण बहादुर मगर र संखुवासभाका राजेन्द्र कार्की मन्त्री बन्दैछन् । मगरलाई सामाजिक विकास र कार्कीलाई खानेपानी मन्त्रालय दिने तयारी छ । मन्त्रालयको अन्तिम टुंगो लगाएर आजै चार बजे शपथ ग्रहण हुने मुख्यमन्त्री कार्कीले बताए । आर्थिक मामिला तथा योजना मन्त्रालय भने मुख्यमन्त्री कार्की स्वयमले राख्ने भएका छन् ।

हाल कोशी प्रदेश सरकारमा भौतिक पूर्वाधार विकास मन्त्री कमल प्रसाद जवेगु र पर्यटन वन तथा वातावरण मन्त्री गणेशप्रसाद उप्रेती छन् । यस्तै शमशेर राई आन्तरिक मामिला तथा कानुन मन्त्री छन् ।
गत असोज २७ गते मुख्यमन्त्री नियुक्त भएका कार्कीले पहिलो पटक मन्त्रिपरिषदमा विस्तार गरेका थिए । त्यसबेला एमालेबाट रामबहादुर राना मगर र काँग्रेसका शम्शेर राईलाई मन्त्रीमा नियुक्त गरेका थिए । दोस्रो पटक १७ कार्तिकमा माओवादीलाई सरकारमा सामेल गराएपछि एमाले सरकारबाट बाहिरिएको थियो ।
प्रदेश सरकार गठन भएको सय दिन बितिसक्दा पनि सरकारले पूर्णता दिन नसेको भन्दै आलोचना खेप्दै आएका मुख्यमन्त्री कार्कीले तेस्रो पटक मन्त्रीमण्डल विस्तार गर्न लागेका हुन् ।

कांग्रेसका विद्रोही ८ सांसद र एमालेका ३९ सांसदको सहयोगमा कार्की गत असोज २७ गते मुख्यमन्त्रीमा नियुक्त भएका थिए । असोज २८ गते शपथग्रहण गरेका दिन नै उनले एमालेबाट रामबहादुर राना र कांग्रेसबाट शम्शेर राईलाई मन्त्री नियुक्त गरेका थिए ।
कार्कीले कात्तिक १ गते नै विश्वासको मत लिए । उनलाई राप्रपाका ६ सांसदबाहेक सबैले विश्वासको मत दिएका थिए ।