विराटनगर । विराटनगरस्थित झी : पुचमा नेवारी समुदायमा कन्याहरूको सामुहिक बेलविवाह गरिएको छ ।
५ देखि ११ वर्षसम्मका कन्याहरूको बेलविवाह गरिदिने प्रचलनअनुसार झी पुचः विराटनगरले हरेक वर्ष सामूहिक बेलविवाह कार्यक्रम गर्दै आएको छ । मंगलबार झी : पुचमा २० जना नेवारी कन्याहरुको सामूहिक बेलविवाह गरेको झी ः पुच विराटनगरका निर्वतमान अध्यक्ष हरीबहादुर श्रेष्ठले जानकारी दिए । यसपटकको बेलविवाहमा सिक्किम, सिन्धुली, रंगेली, दमक र विराटनगरका गरी २० जना कन्या र तिनका अभिभावकको सहभागिता रहेको बताइएको छ । ३४ वटा विधिहरू गरेपछि बेलविवाह अर्थात ईही सम्पन्न हुने गर्दछ ।

बेलविवाहमा सहभागी कन्याहरूको बगलामुखी मन्दिरका पुजारी राजेन्द्र राजोपाध्यायले वैवाहिक संस्कार गराएका छन् । नेवार कन्याहरूको महिनावारी हुनु अघिनै बेलसंँग विवाह भइसक्नुपर्ने धार्मिक परम्परा छ ।

झी पुचः ले नेवारी भाषा, संस्कृति र परम्पराको जर्गेनामा चार दशकभन्दा लामो समयदेखि सक्रिय छ । झी पुचःले गर्ने विविध कार्यक्रममध्ये बेलविवाह पनि एक हो । बेलविवाहलाई नेवारी भाषामा ‘इही’ भनिन्छ । झी पुचःको भवनमा सोमबार सुरु भएको सामूहिक बेलविवाह मंगलबार समापन भएको हो ।
विगत ४० वर्षदेखि झी पुचःले बेलविवाह, व्रतबन्ध, गाईजात्रालगायतका गतिविधि सञ्चालन गर्दै आएको छ । ५ देखि ११ वर्षभित्रका कन्याको विधिपूर्वक बेलविवाह गरिन्छ । नेवारी संस्कृतिमा बेलविवाहको धेरै नै महत्व रहेको छ ।