विराटनगर । विराटनगर ११ जनपथटोलमा रहेको कपडाको हलसेल पसल गर्ने स्वस्तिका ट्रेड एण्ड सप्लायर्समा राजस्व अनुसधान विभागको टोलीले छापा मारेको छ । आइतबार विभागको टोलीले छापा मानेर सप्लायर्सको कागजपत्र बरामद गरेको छ । विभागले भन्सारबाट आयात भएको परिमाणअनुसार मालवस्तुको गणना सुरु गरेको छ । टोलीले आयत र विक्री वितरण गरेको बिलबिजक बरामद गरि अनुसन्धान सुरु गरेको छ । विभागको टोलीले एकवर्ष अवधिमा यो सप्लायर्समा छापा मारेको दोस्रो पटक हो ।
यसअघि स्थानीय प्रशासन र आन्तरिक रजश्व कार्यालयले पनि छापा मारेर स्टक परिमाणको अध्ययन गरेको थियो । यसअघि गरिएको छापामा आन्तरिक राजश्व कार्यालय र विभागको टोली रित्तो हात फर्केको सप्लायर्सका संचालक सञ्जीव भगतको दाबी छ ।
सुती र पप्लिन कपडाको कारोबार गर्ने यो सप्लायर्समा हाल १४ करोडको सुती र पप्लिन कपडा स्टक रहेको भगतले बताए । सबै सामान भन्सार तिरेर आयात गरिएको उनको दाबी छ ।
भन्सार छलेर आयात गरिएका सामान स्टक हुने गरेको सूचनाका आधारमा विभागको टोली आफैं आएर आयात परिमाण, खरिद–विक्री खाता र स्टक परिमाणको अनुसन्धानसँगै कागजातका आधारमा स्टक गणना गरेको राजश्व विभाग स्रोतले बतायो । अहिले राजस्व अनुसन्धान विभागबाट आएको टोली आएर अनुसन्धान सुरु गरेको राजस्व अनुसन्धान कार्यालय इटहरीका प्रमुख सुरेश आचार्यले बताए । विभागबाट आएको टोलीले शुक्रबार पनि विराटनगरको भन्सार एजेन्टका सहयोगीले संचालन गरेको फर्ममा छापा मारेको छ । भन्सार छली गरि चोरी तस्करी मार्फत कपडा ल्याएको सूचनाको आधारमा विभागले छापा मारेर अनुसन्धान गरेको बुझिएको छ ।
राजस्व अनुस्न्धान विभागका तीन सदस्य टोली अहिले कोशी प्रदेशमा आइपुगेको छ । अनुसन्धान अधिकृतसहितको टोली भन्सार छली गरेको प्रयाप्त सूचनाको आधारमा अहिले मोरङ र सुनसरीको विभिन्न फर्महरुमा छापा मार्दै कागजपत्र जफत गरी अनुसन्धान गर्दै आएको हो ।