नेकपा एमालेको माधव नेपाल–झलनाथ खनाल समूहले मोरङ जिल्ला र विराटनगर महानगरमा शुक्रबार समानान्तर कमिटी गठन गरेको छ । वरिष्ठ नेता माधवकुमार नेपालको उपस्थितिमा सो समूहले दुवै कमिटी घोषणा गरेको हो ।

सो समूहले एमालेका पूर्वउपाध्यक्ष चन्द्रवीर राईको नेतृत्वमा तीन सय २५ सदस्यीय समानान्तर जिल्ला कमिटी घोषणा गरेको छ । उपाध्यक्षमा चण्डीप्रसाद राई र डा. उद्धव पोखरेल छन् । त्यसैगरी सचिवमा राजन केसी, उपसचिवमा वसिम आलम, निलम ढुंगेल र आर्थिक प्रमुखमा विश्वनाथ राय चयन भएका छन् ।

त्यसैगरी, युवा नेता पारुल क्षेत्रीको नेतृत्वमा १ सय ७५ सदस्यीय महानगर कमिटी गठन गरेको पनि घोषणा गरेको छ । महानगर कमिटीको उपाध्यक्ष खेम तिम्सिना, सचिव हीरामिरा दाहाल, उपसचिव योगेशराज भण्डारी चयन भएका छन् ।

कार्यक्रमलाई सम्बोधन गर्दै नेता माधव नेपालले अध्यक्ष केपी शर्मा ओलीले अहिलेको गतिविधि जारी राखेर पार्टीलाई विभाजनतर्फ धकेलेकाले आफूहरू हातमा दही जमाएर नबस्ने बताए । उनले पार्टी र कम्युनिस्ट आन्दोलन आफूहरूले जोगाउनेसमेत बताए ।