विराटनगर । नेपाल पत्रकार महासंघको कार्यबहाक अध्यक्षको विवाद टुंगिएको छ । नेपाल पत्रकार महासंघ केन्द्रीय समितिले विधानको व्याख्या गर्दै जिल्ला शाखाको हकमा बरिष्ठ उपाध्यक्ष खुल्ला उपाध्यक्ष नै हुने व्याख्या गर्दै पत्र पठाएपछि विवाद सुल्झिएको हो ।

विधानमा जिल्लामा रहेका खुल्ला उपाध्यक्ष बरिष्ठ हुने कि महिला उपाध्यक्ष बरिष्ठ हुने भन्ने विवाद भएको थियो । उक्त विवादको व्याख्या गर्दै केन्द्रीय समितिले नेपाल पत्रकार महासंघको विधान २०६० (पाँचौं संशोधन २०७५) परिच्छेद ५ को दफा २२ को उपदफा १ मा उल्लेखित बरिष्ठ उपाध्यक्षको काम, कर्तव्य र अधिकारको विषय जिल्ला शाखाको हकमा खुल्ला उपाध्यक्षको हुने भएकोले सोही बमोजिम गर्न भन्दै प्रदेश समितिलाई पत्र पठाएको छ ।

विधानमा अध्यक्ष कुनै कारणले आफ्नो काम गर्न असमर्थ भएमा, काम विशेषले देशबाहिर रहेमा वा निजको पद रिक्त भएमा कार्यबहाक अध्यक्षको रुपमा निजको कर्तव्यको पालना र अधिकार प्रयोग गर्न जिम्मेवारी बरिष्ठ उपाध्यक्षको काम, कर्तव्य र अधिकारमा उल्लेख हुने उल्लेख छ ।

केन्द्रले गरेको विधानको व्याख्या अनुसार नेपाल पत्रकार महासंघ प्रदेश समितिले मंगलबार पत्रकार महासंघ मोरङ शाखालाई पत्र पठाउँदै केन्द्रीय समितिको पत्रमा उल्लेख भएको विधानको व्याख्या अनुसार कार्यान्वयन गर्न निर्देशनसमेत दिएको छ ।

प्रदेश समितिको तर्फबाट अध्यक्ष लिलाबल्लभ घिमिरे र महासचिव विवेक गौतमले हस्ताक्षर गरेर दिएको पत्रमा यस्तो उल्लेख भएको हो । उक्त पत्रको बोधार्थ मोरङ शाखाका खुल्ला उपाध्यक्ष मोहन भट्टराईलाई पनि पठाइएको छ ।

मोरङ शाखाका अध्यक्ष संजीव खनाल विदेश गएको पाँच दिनपछि उनले कार्यबहाक अध्यक्ष चलाउन भन्दै समावेशी उपाध्यक्ष तारा आचार्यलाई पत्र दिएका थिए । उक्त विषयमा असहमति जनाउँदै खुल्ला उपाध्यक्ष मोहन भट्टराईले आवश्यक निर्णय दिन पत्रकार महासंघ प्रदेश समितिलाई पत्र पठाएका थिए । प्रदेशले केन्द्रको व्याख्या अनुसार एक महिनापछि भट्टराईलाई पत्र दिएको हो ।
यस्तै प्रेस सेन्टर मोरङले अध्यक्ष खनालले विधानको व्यवस्था विपरीत कार्यबहाक अध्यक्ष तोकेको भन्दै पत्रकार महासंघ मोरङमा तालाबन्दीसमेत गरेको थियो । पत्रकार महासंघ केन्द्र समिति र प्रदेश समितिका पदाधिकारीले अध्यक्ष खनालको पत्र कार्यान्वयन नहुने आश्वासन दिएपछि प्रेस सेन्टरले तालाबन्दी खोलेको थियो ।