विराटनगर । विराटनगरस्थित शिक्षादीप कलेजले एघारौँ विज्ञान दिवस विभिन्न कार्यक्रम आयोजना गरी मनाएको छ । कलेज परिसरमा आइतबार भव्य कार्यक्रम आयोजना गरी विज्ञान दिवस मनाएको हो ।
दिवसको अवसर पारेर विभिन्न प्रतियोगितामा उत्कृष्ट हुने विद्यार्थीहरुलाई पुरस्कृत गरेको छ । कलेजले केही दिन अगाडी ‘ओजोन तह विनाश र यसका संरक्षणका उपायहरु’शीर्षकको निबन्ध लेखन प्रतियोगिता आयोजना गरेको थियो । उक्त प्रतियोगितामा शिक्षादीप कलेजमा अध्ययरत विज्ञान संकायका ८० जना विद्यार्थीले भाग लिएका थिए । जसमध्ये उत्कृष्ट प्रथम हुने एन्जल राई, द्वितीय सपना कटुवाल र तृतीय सुगम ढकाललगायत सान्त्वना पुरस्कार प्राप्त गर्ने आठ जना गरी जम्मा ११ जना विद्यार्थीलाई पुरस्कृत गरिएको कलेजका प्रिन्सिपल ज्ञानबहादुर खड्काले जानकारी दिए । प्रतियोगिताको निर्णायकको भूमिका डिग्री क्याम्पस प्राणी विज्ञानका उपप्राध्यापक मिलन खरेलले निर्वाह गरेका थिए ।
त्यसैगरी विज्ञान दिवसकै अवसरमा भाद्र महिनाका प्रत्येक शनिवार सञ्चालित चिकित्सा विज्ञान तथा इन्जिनियरिङका पूर्व तयारी कक्षाको परीक्षामा प्रथम र द्वितीय हुने विद्यार्थीहरु पनि पुरस्कृत भए । उक्त परीक्षाहरुमा चिकित्सा विज्ञानतर्फ सुशीलकुमार यादव, रवीनकुमार यादव,पृथ्वीनारायण मण्डल र आदर्श सिंहले उत्कृष्टताको पुरस्कार प्राप्त गरे । इन्जिनियरिङ्तर्फ निश्चल आचार्य, प्रशान्त कार्की, निर्णय श्रेष्ठ र प्रियङ्का कुमारी भगतले उत्कृष्ट अंक प्राप्त गरी पुरस्कृत भएका छन् ।
कलेजका प्रिन्सिपल ज्ञानबहादुर खड्का, चिफ एकाडेमिक निर्देशक रमेशकुमार मण्डल, विज्ञानका कोअर्डिनेटर नवीनकुमार राय तथा अग्रज प्राध्यापकहरुले नगद पुरस्कार तथा प्रमाणपत्र वितरण गरेका थिए ।
प्रिन्सिपल खड्काले शिक्षादीप कलेजले विद्यार्थीहरुको आन्तरिक प्रतिभा प्रष्फुटन गराउने र उनीहरुको चौतर्फी विकासका लागि वर्षै भरिका सान्दर्भिक दिवसहरु विद्यार्थीहरुको प्रतियोगात्मक सहभागिता मनाउने गरिएको बताए । यस वर्षको राष्ट्रिय विज्ञान दिवस ‘विज्ञान साक्षरता र उद्यमशीलताः सबल अर्थतन्त्रको आधारशिला’ भन्ने मूलनाराका साथ मनाइँदै छ । ओजोन तह संरक्षण दिवस र विज्ञानको दिवसको इतिहास तथा वर्तमान सन्दर्भका बारेमा निर्देशक रामचन्द्र अधिकारीले बताए ।