जनकपुरधाममा पनि अब कोरोना भाइरस (कोभिड–१९) को परिक्षण सुरु भएको छ । प्रादेशिक अस्पताल जनकपुरधाममा प्रोटेबल पीसीआर मेसिनको जडान गरिएसँगै यहाँ पनि कोरोना परीक्षण सुरु भएको हो ।प्रदेश–२ मा पनि जनकपुरधाममा कोरोना परीक्षण मेसिन उपलब्ध भएसँगै यहाँका बिरामीलाई सहज हुने भएको छ ।

पीसीआर मेसिन जडान गर्न आएका धुलिखेल अस्पतालका सुरेन्द्र मधुपले यो मेसिनमा एक पटकमा एकमात्र नमूना लोड हुने र रिपोर्ट आउन एक घण्टा समय लाग्ने बताए । मधुपले आफूहरु प्राविधिक टोलीसहित मेसिन लिएर जनकपुर आएको र यहाँका प्राविधिकलाई समेत परिक्षणको विधि सिकाएर काठमाडौं फर्कने बताए ।

मधुपसँगै सम्बन्धित क्षेत्रका जानकार विवेक तिमिल्सनासमेत जनकपुरधाम आएका छन् । कोरोना परीक्षण मेसिनको आज सुभारम्भ गर्दै प्रदेश–२ का सामाजिक विकासमन्त्री नवल किशोर साहले अब यहाँका जनतालाई केही राहत पुगेको बताए । उनले छिट्टै सप्तरीको राजविराज तथा पर्साको वीरगन्जमा पनि कोरोना भाइरसको परिक्षण सुरु गर्ने घोषणा गरे ।