विराटनगर । कृष्ण जन्माष्टमीको अवसरमा विराटनगरमा बिहीबार ५५ औं धार्मिक तथा ऐतिहासिक राधाकृष्ण रथयात्रा निकालिएको छ । कृष्णजन्माष्टमीको भोलिपल्ट राधाकृष्ण रथयात्रा भव्य निकालिएको हो । खटयात्रालाई २०२५ सालबाट भगवान राधाकृष्ण रथयात्रा महोत्सवको रुपमा महानगरवासीले मनाउँदै आएका हुन् ।

सुनौलो रंगमा पैगोडा शैलीको २२ फिट लामो, १४ फिट चौडा र १८ फिट अग्लो फलामको रथको अगाडिको भागको दायाँ र बायाँ दुवैतिर ५०र५० फिट लामो लट्ठा तान्दै रथयात्रा निकालिएको हो । रथको दायाँ लट्ठा पुरुष र बायाँ महिला भक्तजनले तान्ने परम्परा छ । रथयात्रामा सहभागी भएर रथ तान्दा मनोकांक्षा पूर्ण हुनुका साथै पुण्य प्राप्ती हुने जनविश्वास छ ।

विराटनगर–१ स्थित राधाकृष्ण मन्दिर परिसरमा भगवान राधा र कृष्णको प्रतिमालाई रथमा आरुढ गराएर विशेष पूजा र दर्शन गरेपछि रथयात्रा ३स्३० बजे सुरु भएको थियो । विशेष पूजा र दर्शन समारोहमा ललितपुर महानगर प्रमुख चिरिबाबु महर्जनलगायत १४ नगर प्रमुख र दुई जना उपप्रमुखको विशेष उपस्थिति रहेको थियो ।

दक्षिण एसियाको दोस्रो ठूलो मानिने रथयात्रा राधाकृष्ण मन्दिरबाट सुरु भई मेनरोड हुँदै ट्राफिकचोकबाट रोडशेषचोक र त्यहाँबाट महेन्द्र चोकदेखि, बरगाछीसम्म र त्यहाँबाट पुनः मन्दिर परिसरसम्म ९ किलोमिटर दुरी करिब ६ घण्टामा तय गरेर आइपुग्ने आयोजक समितिका संयोजक कैलाश रेग्मीले बताएका छन् । ‘भक्तजनहरूका लागि रथयात्राको दर्शन र वैदिक मन्त्रसहितको पूजाका लागि ४३ ठाउँमा विश्राम दिने व्यवस्था छ,’ उनले भने, ‘रथयात्रामा नेपाल र भारतका गरी ५ लाखभन्दा बढी भक्तजन सहभागी भएर प्रत्यक्ष अवलोकन, दर्शन र पूजापाठ गरेका हुन् ।’

रथको अगाडि विभिन्न जातजाति, सम्प्रदाय, धर्म संस्कृति झल्किने ६० वटा झाँकी, भजन मण्डलीहरु र प्रदेश १ प्रहरीको ब्यान्डले रथयात्राको रौनक बढाइदिएको थियो । रथयात्रामा जनकपुरबाट आएका हनुमान नृत्य आकर्षणको केन्द्र बनेको थियो । रथयात्राका सहभागी श्रद्धालु भक्तजनहरुको स्वास्थ्यमा कुनै किसिमको समस्या आएको अवस्थामा स्वास्थ्य जाँचका साथै प्राथमिक उपचारका लागि रथयात्रा मार्गमा ७ ठाउँमा चिकित्सक टोली र रथको अगाडि र पछाडि १० वटा एम्बुलेन्सको व्यवस्था गरिएको थियो । रथयात्रामा सहभागी भक्तजनहरुका लागि आयोजकका साथै स्थानीय विभिन्न संघ संस्थाहरुले निःशुल्क खानेपानी र सवर्तलगायत खानेकुराको व्यवस्था गरेका थिए ।