विराटनगर । तेली कल्याण समाजले निवन्ध प्रतियोगिता आयोजना गर्ने भएको छ । आउँदो भदौ ९ गते समाजले निवन्ध प्रतियोगिता गर्ने भएको हो ।
‘संघीयतामा जातीय एकताको आवश्यक्ता र चुनौती’ विषयक शीर्षकमा निवन्ध प्रतियोगिता आयोजना गर्ने भएको तेली कल्याण समाजका अध्यक्ष डा. बालकृष्ण साहले जानकारी दिए । प्रतियोगितामा कक्षा ९ देखि माथिका विद्यार्थीहरुले भाग लिन पाउनेछन् । प्रतियोगितामा प्रथम हुनेले नगद ६ हजार, द्वितीय हुनेले तीन हजार र तृतीयले दुई हजार रुपैयाँ पुरस्कार रहेको छ ।

विद्यार्थीहरुमा भएको क्षमता अभिवृद्धी गर्ने उद्देश्यले निवन्ध प्रतियोगिता आयोजना गरिएको अध्यक्ष साहले बताए । जातिय एकता र महत्त्वका बारेमा रुचि राखुन् र यश सम्बन्धि खोज, अध्ययन गर्दै समाजलाई बुझाउन सकुन भन्ने उद्देश्यका साथ सजातीय युवाहरुलाई उत्प्रेरित गर्दै प्रतियोगिता आयोजना गर्न लागिएको उनले बताए । यसले एक अर्कामा परिचय, सहयोग र सद्भाव समेत बढ्नेमा विश्वास राखेको उनको भनाई छ ।

‘प्रतियोगितामा सहभागि इच्छुक विद्यार्थीहरुको लागि सूचना पनि जारी गरिएको छ,’ उनले भने । प्रतियोगिताको पहिलो समूह कक्षा ९ देखि १२ अध्ययनरत र दोस्रो समूह सो भन्दा माथिका विद्यार्थीहरुका लागि हुनेछ । पहिलो समूहको लागि पूर्णाङ्क २० र दोस्रो समूहका लागि पूर्णाङ्क ३० रहेको छ । पहिलो समूहको लागि २०० र दोस्रो समूहको लागि ३०० शब्दमा नघटाइ निबन्ध लेख्नुपर्नेछ । पुरस्कार विराटनगर महानगरको नगर अधिवेशनको दिन वितरण गरिने अध्यक्ष साहले बताए ।

कार्यक्रम संयोजक तथा शिक्षा समिति संयोजक दिपक साह हुन् ।