विराटनगर । लामो समयसम्म मोरङको कटहरी गाउँपलिका १ स्थित तरकारी तथा फलफूलको थोक तथा खुद्रा बजार सञ्चालन गर्न नसकेर प्रयोगविहीन भएको संरचनामा कटहरी गाउँपालिकाले साप्ताहिक हटिया लगाउने बाटो उच्च अदालत विराटनगरले खुल्ला गरिदिएको छ । उच्च अदालत विराटनगरका न्यायाधीश विपुल न्यौपाने र मिलन कुमार राईको संयुक्त इजालशले विपक्षीलाई अन्तरीम आदेश दिन अस्विकार गर्दै गाउँपालिको पक्षमा नियम अनुसार काम कारवाही अगाडी बढाउन आदेश गरेको हो ।

कटहरी गाउँपालिकाले उक्त संरचनामा बुध हटिया लगाउने निर्णय गरेको थियो । तर, विवादको कारणले रोकिएको थियो । त्यसपछि विराटनगर ९ की ६३ वर्षीया रीता कोइरालाले निजी जग्गा मिचेर हटिया लगाएको भन्दै कटहरी गाउँपालिका, प्रमुख देवराज चौधरी, कटहरी १ का वडाअध्यक्ष हरीराज राजवंशीलाई विपक्षी बनाएर रिट निवेदन दर्ता गराएको थियो । अदालतले निवेदकको पक्षमा अन्तरीम आदेश दिन अस्वीकार गरेसँगै कटहरी गाउँपालिकालाई हटिया लगाउने बाटो खुलेको हो ।
‘स्थानी सरकार संचालन ऐन २०७४ को दफा ११(२) ले गाउँपालिकालाई बजार तथा हाट बजार व्यवस्थापन गर्ने अधिकार प्रदान गरेको देखिंदा विपक्षी कटहरी गाउँपालिकाको कार्यालयले निवेदकको दाबीको जग्गामा व्यवस्थापन भई आएको हाट बजार अन्यत्र सारी सोलाई व्यवस्थित गर्ने र प्रभावकारी बनाउने सम्बन्धमा गर्ने कार्यबाट निवेदकको आफ्नो जग्गा उपभोग गर्न पाउने अधिकारमा असर पर्ने स्थिति नदेखिंदा निवेदकको माग बमोजिम अन्तरिम आदेश जारी गर्नुपर्ने अवस्थाको विद्यमानता देखिएन । कानुन बमोजिम गर्नु,’ आदेशमा उल्लेख छ ।

चार वर्ष अघि २०७६ चैत्र ३ गते तत्कालीन प्रधानमन्त्री केपी शर्मा ओलीले विराटनगरस्थित कटहरी फलफूल तथा तरकारी थोक बजारको उद्घाटन गरेका थिए । नेपाल सरकारले १५ करोड रुपैयाँ खर्च गरेर तरकारी तथा फलफूलको थोक तथा खुद्रा बजार बनाएको थियो । चार वर्ष बितिसक्दा पनि बजार प्रयोगमा नआएपछि कटहरी गाउँपालिकाले हटिया संचालनमा ल्याउने तयारी गरेको हो ।