विराटनगर, फागुन १२–ब्लड क्यान्सरबाट पीडित भएका विराटनगरस्थित मकालु टेलिभिजनका समाचार प्रमुख कमल पौडेलको उपचारमा सहयोग गर्ने उद्देश्यले स्पार्क हेल्थ होम हस्पिटल काठमाडौंले १ लाख सहयोग गरेको छ । स्पार्क हेल्थ होम हस्पिटलले आफ्नो २८ औं वार्षिकोत्सवको अवसरमा क्यान्सरका बिरामी पत्रकार पौडेललाई उपचारमा खर्चका लागि १ लाख प्रदान गरेको हो ।

हस्पिटलले पत्रकार पौडेलका छोरालाई सहयोग रकम हस्तान्तरण गरेको छ । सहयोगको चेक हस्तान्तरण गर्दै अस्पतालका मेडिकल डाईरेक्टर डा.सुनिल पौडेलले पत्रकार पौडेलले आफूहरुलाई गरेको सहयोग कहिल्यै नबिर्सिने बताए ।

टाइफाइड र ज्वरोको समस्या देखिएपछि उपचार सुरु गरेका पौडेललाई उपचारकै क्रममा ब्लड क्यान्सर भएको पत्ता लागेको थियो । हाल उनको काठमाडौंको सिभिल अस्पतालमा उपचार भईरहेको छ । काठमाडौमा विभिन्न संचार माध्यममा लामो समय पत्रकारिता गरेका पौडेल हाल विराटनगरस्थित मकालु टेलिभिजनको समाचार प्रमुख हुन् ।

ब्लड क्यान्सरको उपचारका लागि पौडेलको उपचारमा ३० लाख रुपैयाँभन्दा बढी खर्च हुने अस्पतालले जनाएपछि मकालु टेलिभिजन, प्रदेश १ पत्रकार महासंघसहित, पत्रकार महासंघ मोरङ शाखा तथा उनका शुभेच्छुकहरुले स्वतस्फुर्तरुपमा सहयोग संकलन अभियान सुरु गरेका छन् ।