विराटनगर । विराटनगर– ५ स्थित एभरेष्ट स्कुलले मन्टेश्वरी कक्षाका विद्यार्थीका अभिभावकसँग कार्यशालाको आयोजना गरेको छ ।
विद्यालयले शिक्षण सिकाइका लागि अपनाउँदै आएका कृयाकलापका विषयमा अभिभावकलाई जानकारी गराउने उद्देश्यका साथ कार्यशाला आयोजना भएको हो ।

शुक्रबार नर्सरी र एलकेजीका विद्यार्थीका अभिभावकसँग कार्यशाला सम्पन्न भएको छ । कार्यशालामा सहभागि अभिभावकलाई सम्वोधन गर्दै विद्यालयका प्राचार्य ९प्रिन्सिपल० टिकाराम पुरीले युग सुहाउँदो शिक्षण सिकाईका लागि आफूहरुले प्रयत्न गरिरहेको भन्दै यसलाई सार्थक बनाउँदै लैजान अभिभावकको समेत सहयोग आवश्यक रहेको चर्चा गरे । उनले बाल मनोविज्ञानलाई बुझेर उनीहरुकै सहभागितामा विभिन्न प्रयोगात्मक विधिका साथ शिक्षण सिकाई हुँदै आएको भन्दै बाल मनोविज्ञानलाई अभिभावकले समेत बुझ्न आवश्यक रहेको बताए ।

गर्भावस्थादेखि नै बालबालिकाको ‘केयर’ आवश्यक रहेको चर्चा गर्दै उहाँले सानै उमेरबाट नै दिईने वातावरणले बालबालिकाको भविष्यलाई निर्धारण गर्ने बताए । हिजो बालबालिकालाई नियन्त्रण कन्ट्रोलमा राख्ने विधि अपनाउने गरिएको स्मरण गर्दै उनले अहिले त्यो पद्धत्ति गलत सावित भइसकेको बताए ।
उनले भने, ‘हिजो हामी शासनमा राख्न खोज्थ्यौं, त्यो गलत थियो । अब साथी बनाएर हरेक कुरामा सहभागि गराएर अघि बढ्नुपर्ने छ ।’ नियन्त्रणमा राख्न खोज्दा बालबालिका विद्यालयमा गुरुहरुसँग र घरमा अभिभावकहरुसँग टाढिन पुग्ने मात्रै नभई बढ्दो उमेरसँगै डिप्रेसनमा जाने, कुलतमा फस्नेलगायतका विभिन्न समस्याहरु देखापर्ने प्रिन्सिपल पुरीले बताए ।

कार्यशालामा विद्यालयका सहायक प्राचार्य टीएन भण्डारीले विद्यालयले सिकाएको शिक्षण पद्धति अनुरुप अभिभावकले पनि भूमिका निर्वाह गर्न सक्दा बालबालिकालाई कुशल ब्यक्तित्व बनाउन सहयोग पुग्ने विश्वास ब्यक्त गरे । उनले त्यसका लागि अभिभावकहरुले केहि विषयमा विशेष ध्यान दिन आग्रह गरे । करिब एक सय जना अभिभावकको सहभागिता रहेको कार्यशालामा सहभागीहरुलाई विभिन्न विधिबाट मनोरञ्जन दिलाउँदै बालबालिकाले कसरी सिक्छन् भन्ने विषयमा जानकारी दिइयो । मन्टेश्वरी तहकी इन्चार्ज रेश्मी क्षेत्रीले अभिभावकहरुलाई सिकाईका विषयमा व्यवहारिक रुपमा जानकारी गराए ।

कार्यशालामा अभिभावकहरुले पनि बालबालिकाले जस्तै खेल्दै, प्रयोगात्मक गर्दै, शिक्षण सिकाईको बिषयमा जानकारी लिएका छन् । अभिभावक तथा वरिष्ठ नायव निरिक्षक यज्ञराज शर्माले विद्यालयले अपनाएको शिक्षण सिकाई विधि अत्यन्तै राम्रो रहेको भन्दै कार्यशालाले अभिभावकलाई पनि बाल मनोविज्ञान अनुसारको वातावरण बनाउन उत्प्रेरित गरेको बताए ।