विराटनगर । कैद भुक्तान हुन एक महिना बाँकी रहदा मोरङ कारागारका चौकीदार अभिषेक गिरीको स्थान्तरण हुने भएको छ । अपहरण तथा शरीर बन्धक मुद्दामा कैद भुक्तान गर्दै आएका गिरीको मकवानपुरको भीमफेदी कारागार स्थानान्तरण गरिने भएको हो ।

कैद भुक्तान हुन एक महिना मात्र बाँकी रहदा उनलाई स्थान्तरणको लागि आइतबार पत्र प्राप्त भएको छ । उनको फागुन ३ गते कैद भुक्तान सिकिदैछ ।

विराटनगरका स्थानीय एमालेका नेताले दबाव दिएर गृहमन्त्री रवि लामिछानेको निर्देशनमा कारागार व्यवस्थापन विभागले गिरीलाई ‘जतिसक्दो चाँडो’ स्थानान्तरण गर्नु भनेर मोरङ कारागारलाई पत्र पठाएको हो । उनको सरुवाको निर्णय भने केही दिनअघि भएको बताइएको छ ।

विभागका महानिर्देशक चक्रपाणी पाण्डेले गिरीलाई भीमफेदी स्थानान्तरण गर्न पत्राचार भइसकेको पुष्टि गरे । उनका अनुसार अब मोरङका प्रमुख जिल्ला अधिकारी र जेलरले समन्वय गर्दै गिरीलाई स्थानान्तरणका लागि वातावरण तयार पार्नुपर्ने छ । मोरङका प्रजिअ काशीराज दाहालले गिरीको स्थानान्तरणको तयारी गर्न कारागारलाई निर्देशनसमेत दिएका छन् ।

गिरीलाई २०७८ मंसिर ९ गते मोरङ कारागार ल्याइएको थियो । मोरङ कारागारको चौकीदार भएर गिरी आएपछि कारागार भित्र केही हदसम्म सुधार पनि भएको छ । त्यहाँ गिरीको पहलमा कैदीबन्दीहरूले शुद्ध खानेपानीको व्यवस्था गरेको छ भने समय–समयमा स्वास्थ्य शिविर पनि हुने गरेको छ । कारागार भित्र मठमन्दिर पनि निर्माण गरेका छन् ।

मोरङ कारागारका निमित्त जेलर तुलसीराम भगतका अनुसार सार्वजनिक विदाका कारण स्थानान्तरणको प्रक्रिया अघि बढाउन सकिएको छैन । ‘कार्यालय खुलेपछि प्रक्रिया पूरा गरेर गिरीलाई भीमफेदी लगिने छ,’ उनले भने,‘स्थानान्तरणको वातावरण तयार पार्न सुरक्षा निकायसँग पनि समन्वय भइरहेको छ ।’ भगतले गिरीको सरुवासँग सम्बन्धित पत्र भने कार्यान्वयनतर्फ गइसकेको जानकारी दिए ।