विराटनगर । सवारी दुर्घटना न्यूनिकरणकका लागि ट्राफिक प्रहरीले सवारी साधनमा ‘रिफ्लेटिक्भ स्टिकर’ टाँस्ने अभियान सुरु गरिएको छ । हुस्सु लागेको समयमा दुर्घटना संभावना जोखिम धेरै हुने भएकोले शुक्रबारबाट ट्राफिक प्रहरीले अभियान सुरु गरेको हो ।

प्रहरी साहयक निरीक्षक तुलामणी आचार्यको नेतृत्वमा सवारी साधनमा रिफ्लेक्टिभ स्टिकर टाँस्न थालिएको छ । विराटनगर महानगरपालिका– १९ घिनाघाट चौकदेखि सुरु गरिएको अभियानमा साईकल, टिफर, तथा बेलगाडा समेतमा स्टिकर टाँसिएको आचार्यले जानकारी दिए ।

‘पछिल्लो समय तराईको चिसो बढेसँगै मौसम परिवर्तन भएको छ, हुस्सु लाग्न थालेको छ । यो समय दुर्घटनाको जोखिम बढ्न सक्ने सम्भावना धेरै हुन्छ,’उनले भने, ‘दुर्घटना जोखिम नियन्त्रणका लागि सवारी साधानमा स्टिकर टाँस्ने अभियान सुरु गरिएको हो ।’ जिल्ला ट्राफिक प्रहरीले जाडोसँगै सुरु भएको हुस्सुमा सवारी साधन चालक सचेत भएर सुस्त गतिमा हाँक्नका लागि अनुरोध समेत गरेको छ ।

मोरङ ट्राफिक प्रमुख प्रहरी निरीक्षक राजकुमार कार्कीले हुस्सु लागेका बेला सवारीसाधन सञ्चालनमा सहजता ल्याउन चालकलाई आवश्यक प्रशिक्षण दिन थालिएको बताए। ‘गाडीमा ‘फग लाइट’को व्यवस्था गर्न तथा हुस्सु लागेका बेला उक्त लाइट बालेर मात्रै सवारीसाधन चलाउन चालकलाई आग्रह गर्ने गरिएको छ,’ उनले भने, ‘बाटो काट्दा ‘साइड लाइट’को प्रयोगदेखि ट्राफिक नियमको पालनामा विशेष जोड दिएर प्रशिक्षण दिने गरिएको छ।’ साथै सवारी चेकजाँच तीव्र बनाएर ‘वाइपर’को प्रयोगमा समेत जोड दिने गरिएको कार्कीले बताए। 

हुस्सु लागेका बेला नजिकैको वस्तुसमेत नदेखिने हुँदा दुर्घटनाको जोखिम बढी हुने भएकाले तीव्र गतिमा सवारीसाधन नचलाउन पनि ट्राफिक प्रहरीले सबैमा अनुरोध गरेको छ। हुस्सु लाग्ने क्रम बढेसँगै पछिल्लो समय सवारीसाधनमा ‘रिफ्लेक्टर’ राख्ने कार्यमा ट्राफिकले सक्रियता बढाएको कार्कीले बताए।