विराटनगर । दुई लाख रुपैयाँको भारु साट्दा नक्कली भारतीय रूपैयाँ दिने एक जना जग्गा कारोबारीलाई प्रहरीले पक्राउ गरेको छ ।

विरानगर महानगरपालिका २ फुटबल चौकका ४० वर्षीय महेश भन्ने महेन्द्र मेहतालाई प्रहरीले पक्राउ गरेको हो । पक्राउ परेका मेहता जग्गा कारोवारी हुन् ।

उनले कटहरी गाउँपालिका ४ का महादेव पासवानलाई नक्कली भारु पैसाँ दिएर ठगी गरेको आरोप लागेका छ । ठगीमा पर्ने पासवान लामो समयदेखि खुट्टाको विरामी रहेका छन् । उपचारको लागि भारत जाने गरेका थिए । भदौ २० गते उपचारको लागि भारत जाने तयारी गरेका थिए । उपचारको लागि उनलाई भारु रूपैयाँ आवश्यक परेको थियो । चिनेजानेको जग्गा कारोबारी मेहताको घरमा उनी पुगे । उनले २ लाख नेपाली रुपैयाँ दिए । मेहताले २ लाख रुपैयाँ लिएपछि पासवानलाई ५०० र १ सय रुपैयाको भारु ८९ हजार दिएका थिए । ‘मैले दुई लाख रुपैयाँ दिएपछि मेहताले कागजमा पोको पारेर झोलामा हेलर ८९ हजार भारु दिएका थिए । पैसाँ दिदा भारत पुगेपछि खोल्नु भन्दै दिएका थिए । घरमा आएर खोल्दा नक्कली रुपैयाँ रहेछ,’ पासवानले प्रहरीमा दिएको जोहरीमा उल्लेखछ ।

नक्कली रुपैयाँ लिएर ठगीमा परेको भन्दै पासवानले मोरङ प्रहरीमा उजुरी दिएका थिए । प्रहरीमा उजुरी परेपछि मंगलबार मेहतालाई ठगी आरोपमा पक्राउ गरेको छ । पक्राउ परेका मेहतालाई मोरङ प्रहरीले ठगी मुद्दामा मोरङ अदालतमा म्याद थप गरी अनुसन्धान सुरू गरेको मोरङ प्रहरीका प्रवक्ता डिएसपी दिपक श्रेष्ठले जानकारी दिए । ‘नक्कली भारु रुपैयाँ दिएर ठगी गरेको खुलेको छ,’ उनले भने, ‘अहिले घटनाको विषयमा अनुसन्धान भइरहेको छ ।’